रूपन्देही । रूपन्देहीको देवदह नगरपालिकामा तीजको दर खाएपछि ३१ जना बिरामी परेका छन् । नगरपालिकाको वडा नं. ५ र ६ का महिला र पुरुषले सामूहिक दर खाएपछि उनीहरूलाई स्वास्थ्य समस्या भएको हो ।

भदौ ६ गते सहारा आमा समूहमा आबद्ध महिलासहित उनीहरूका परिवार सहभागी भई सामूहिक दर खाएका हुन् । बिहानै खाजा पकाइ खाएर बुटवलको फूलबारी घुमी फर्केका उनीहरूले पुनः खाना खाई रमाइलो गरेर घर गएका थिए ।

बेलुकादेखि बान्ता हुने, टाउको दुख्ने, पखाला लाग्ने, पेट दुख्ने, रिङ्गटा लाग्ने लगायतका स्वास्थ्य समस्या देखिएको थियो । ३१ जनामध्ये पाँच जनाले घरमै औषधि ल्याएर खाएका र अरुले नजिकैको क्लिनिक तथा अस्पतालमा गरेर उपचार गराएका छन्।

धेरैजसो बिरामी निको हुँदै गए पनि चार जनालाई भने देवदह मेडिकल कलेजमा भर्ना गरेर उपचार गरिएको छ।

दरमा ब्रोइलर कुखुरा र खसीको मासु, तरकारी, अचार, भात लगायतको प्रयोग भएको बताइएको छ।

खानामा केही तादात्म्यता नमिल्दा बिरामी परेको हुन सक्ने गिरी मेडिकलका संचालक छविराज गिरीले बताए । उनले बिरामीले अचार, मासु, तरकारी सबै चिज खाएको र तीनैमध्ये केही खाद्यान्न नमिल्दा यसरी असर गरेको हुन सक्ने बताए ।