गण्डकी प्रदेशका स्वास्थ्यमन्त्री कृष्ण प्रसाद पाठकले पर्वत जिल्ला अस्पताल निरिक्षणा गरेका छन् । सोमबार पर्वत जिल्लाको सदरमुकाम कुश्मा बजारमा रहेको पर्वत अस्पताल निरिक्षण गरेका हुन् ।

पर्वत अस्पतालमा जिल्लाबासी मात्र नभएर बाग्लुङ जिल्लाका दक्षिण क्षेत्र नागरिकले पनि धेरै सेवा पाउने गरेका छन् । दूरीका हिसाबले बाग्लुङ जिल्लाको दक्षिण क्षेत्र र पर्वत अस्पताल नजिक रहेको छ ।

मन्त्री पाठकले त्यहाँ सेवा लिन आएका बिरामीसँग पनि अन्तरक्रिया गरेका थिए । बिरामी तथा परिवारहरूले अहिले पर्वत अस्पतालले दिएको सेवामा आफूहरु खुशी रहेको प्रतिक्रिया दिए ।

अस्पतालका सुपरिटेन्डेन्ट डा. हेमन्त बास्तोलाले मन्त्री पाठकलाई अस्पतालले दिन सक्ने सेवा र त्यहाँ भर्ना भएर बसेका बिरामीको बारे जानकारी गराएका थिए ।

त्यसैगरी, अस्पतालको भौतिक संरचनाहरूको समस्या र चुनौती विषयमा अस्पतालका अध्यक्ष शंकर गिरीले जानकारी गराएका थिए । गिरीका अनुसार अस्पतालका धेरै काम प्रदेशको मन्त्रालयमा रोकिएकाले आफूले अझै धेरै सुधार गर्ने नसकिरहेको मन्त्रालयको टीमलाई जानकारी गराएका थिए ।

अस्पतालको निरिक्षण गरेपछि मन्त्री पाठकले आफूले अस्पतालका समस्या जानकारी पाएको र आफूले नीतिगत रुपमा गर्ने सक्ने समस्याको समाधान गर्ने प्रतिवद्धता व्यक्त गरेका थिए ।

पर्वत अस्पतालका पूर्व अध्यक्ष शिव पौडेल, नेकपा एमालेका पर्वतका पार्टी अध्यक्ष समेत रहेका अस्पतालका पूर्व अध्यक्ष गोबिन्द पहाडी , स्वास्थ्य निर्देशनालय गण्डकी प्रदेशका महानिर्देशक खिम बहादुर खड्का लगायतको उपस्थिति रहेको थियो ।