पुतलीबजार नगरपालिका -७ ठुलाडिहीमा विजया दशमी तथा सुभ दिपावलीको अवसरमा पुरुष तथा भेट्रान्स भलिबल प्रतियोगिता हुने भएको छ ।

`हाम्रो गौरव, हाम्रो सान, हाम्रो ठुलाडिही´,`स्वास्थ्यको लागि खेलकुद राष्ट्रको लागि खेलकुद´ भन्ने मूल नारालाई आत्मसात गर्दै ठुलाडिही रि-युनाईटेड क्लब ठुलाडिहीद्वारा कार्तिक ५ गतेदेखि १० गतेसम्म ठुलाडिही बहुउद्देश्यीय खेलमैदानमा वडा स्तरीय पुरुष भलिबल प्रतियोगिता तथा सांस्कृतिक कार्यक्रम आयोजना गरेको खेल संयोजक उत्तम थापाले बताए ।

ठुलाडिही कपको आकर्षणका रुपमा पुरुष तथा भेट्रान्स भलिबल प्रतियोगिताका साथमा हरेक दिन विविध सांस्कृतिक कार्यक्रम रहने कार्यक्रम संयोजक सन्तोष रानाले जानकारी दिए ।

दुईजना बाहिरी खेलाडी समावेश गर्न पाइने पुरुष भलिबल प्रतियोगितामा प्रथम हुने टिमले नगद एक लाख, द्वितीयले ५० हजार र तृतीय हुनेले २५ हजार रुपियाँ पुरस्कार सहित ट्रफी, मेडल र प्रमाणपत्र हात पार्ने छन् ।

यसैगरी, उत्कृष्ट विधा अन्तर्गत उत्कृष्ट प्लयेर, स्पाइकर, ब्लकर, डिफेन्डर, सर्भर र इमर्जिङ प्लयेरलाई ट्रफी, मेडल र प्रमाणपत्रले पुरस्कृत गरिनेछ ।

यस्तै, भेट्रान्स तर्फको प्रथम पुरस्कार घोर्ले खसी सहित ट्रफी, मेडल र प्रमाणपत्र रहेको खेल संयोजक थापाले बताए ।