बालबालिकाको क्षमता विकास गर्ने उद्देश्यका साथ स्याङ्जामा जिल्ला बाल संजालका पदाधिकारीहरुलाई दुईदिने अभिमुखिकरण कार्यक्रम गरिएको छ ।

गण्डकी प्रदेश सरकार, सामाजिक विकास, युवा तथा खेलकुद मन्त्रालयअन्तर्गत सामाजिक विकास कार्यालय स्याङ्जाले स्याङ्जा जिल्ला बाल संजालका पदाधिकारी र सदस्यहरुलाई बाल अधिकार सम्बन्धी अभिमुखिकरण कार्यक्रम गरेको हो ।

कार्यक्रममा बालअधिकार र सामाजिक सञ्जालको प्रयोगबारे कार्यालयका प्रमुख जीवन पौडेल, उद्घोषण र भाषण कलाबारे रेडियो स्याङ्जाका प्रमुख व्यवस्थापक रमेश गोदार, अध्ययन कला र परिक्षा तयारी सम्बन्धमा शिक्षक कृष्ण पौडेल तथा बालसञ्जालले गर्न सक्ने असल कामको बारेमा गण्डकी प्रदेश बाल सञ्जालका पूर्व अध्यक्ष सुदिप पौडेलले सहजिकरण गरेका थिए ।

सामाजिक विकास कार्यालय स्याङ्जाका प्रमुख पौडेलले तालिममा सिकेका कुराहरु आफ्नो स्थानीय तहका विद्यालयका साथीहरुमा ज्ञान बाँड्ने र बाल सञ्जाललाई ११ वटै स्थानीय तह साथै विद्यालयमा प्रभावकारी ढंगबाट विस्तार र कामहरु गर्नेमा जोड दिए ।

कार्यालय प्रमुख पौडेलले बालबालिका लागि भएका यस्ता कार्यक्रमले बालबालिकमा उत्प्रेरणा अभिवृद्धि भई अध्ययन सँगै अतिरिक्त क्रियाकलापमा उनिहरुको सहभागीता बृद्धि हुनुको साथै बालअधिकार र कर्तव्यबारे जानकारी लिन सजिलो हुने बताए ।

जिल्ला बाल अधिकार समिति स्याङ्जाका अध्यक्ष विज्ञान भण्डारीको अध्यक्षतामा सम्पन्न भएको कार्यक्रममा बालबालिका सांस्कृतिक साँझ कार्यक्रम गरी बालबालिकको प्रतिभा प्रस्तुत गरिएको थियो ।