माछापुच्छ्रे  गाउँपालिकाको आयोजनमा भएको माध्यमिक विद्यालय स्तरीय प्रतियोगिताको उपाधि माछापुच्छ्रे–४, लाहाचोकको ज्ञानज्योति बोर्डिङ स्कुलले जितेको छ ।

पालिकाका १२ वटा विद्यालय सम्मिलित प्रतियोगितामा महत्वपूर्ण खेलमा ५ स्वर्ण, २ रजत र १ कास्य प्राप्त गरी उपाधि चुमेको छ । रनिङ शिल्डसंगै विद्यालयले नगद १५ हजार र प्रमाणपत्र प्राप्त गरेको छ ।

५ स्वर्ण, १ रजत र ३ कास्य  प्राप्त गरी माछापुच्छ्रे  मावि दोस्रो भएको छ । बराह माविले ४ स्वर्ण, ७ रजत र २ कास्यका साथ तेस्रो स्थान पाप्त गरेको छ  । दोस्रो र तेस्रो हुने विद्यालयले क्रमशः १० हजार र ७ हजार ५ सय रुपैंया र साथमा ट्रफी, पुरस्कार पाप्त गरेका छन् ।

उक्त प्रतियोगितामा अन्तर मा.वि भलिबल छात्रा/छात्र , कबड्डी छात्रा/छात्र , एथलेटिक्स दौड ट्रयाक १००, २००, ४००, ८००, १५०० र ३००० मि. साथै छात्रा/छात्र ४ ×१०० मि.रिले,  ४×४०० मि.रिले, छात्रा/छात्र, हाइजम्प , लङजम्प,  ट्रिपलजम्प, ज्याभलिङ थ्रो, सटफुट, मार्चपास  लगाएतका खेलहरु सम्पन्न गरेको माछापुच्छ्रे  गाउँपालिका खेलकुद विकास समिति सदस्य सचिव हुम ब. गुरुङले बताए ।

स्वास्थ्यका लागि खेलकुद, राष्ट्रको लागि खेलकुद भन्ने मुल नाराका साथ यही मंसिर ६ गते देखि ८ गते सम्म महेन्द्र माध्यमिक विद्यालयको खेलमैदान लाहाचोकमा भएको थियो ।

सरकारले विद्यालयबाटै खेलकुद प्रतिभाको खोजी गर्दै सम्वर्द्धन र प्रवर्द्धन गर्ने लक्ष्यसहित देशको संघीय संरचना अनुसार स्थानीय, प्रदेश र संघस्तरीय राष्ट्रपति रनिङ शिल्ड आयोजना गर्दै आएको छ । राष्ट्रपति रनिङ एक राष्ट्रिय स्तरको विद्यालयस्तरीय खेलकुद प्रतियोगिता हो ।

गाउँपालिका अध्यक्ष मिन ब. गुरुङको अध्यक्षतामा भएको कार्यक्रमको संचालन शिक्षा, युवा तथा खेलकुद शाखा प्राविधिक सहायक विष्णु प्र. अधिकारीले गरेका थिए ।