स्याङ्जा जिल्लामा सवारी दुर्घटना घट्दै गएको छ । जिल्लाभर सवारी दुर्घटना तुलनात्मक रुपमा घट्दै गएको जिल्ला ट्राफिक प्रहरी कार्यालय स्याङ्जाले जनाएको छ ।

एघार पालिका रहेको स्याङ्जामा तीन आर्थिक वर्षको तथ्यांक अनुसार तुलनात्मक रुपमा सवारी दुर्घटना घट्दै गएको जिल्ला ट्राफिक प्रहरी कार्यालय स्याङ्जाका प्रमुख प्रहरी नायब निरीक्षक सन्तोष पौडेलले जानकारी दिए ।

आर्थिक वर्ष २०७८/०७९ मा ट्रक, ट्याङ्कर, बस, जीप, कार, भ्यान, ट्याक्टर, टेम्पो, मोटरसाइकल लगायतका गरि २९ सवारीसाधन दुर्घटनामा परेका थिए । उक्त दुर्घटनामा परि ४० जनाले ज्यान गुमाएका थिए भने ४८ जना घाइते भएको ट्राफिक कार्यालयले जनाएको छ ।

यसैगरी, आर्थिक वर्ष २०७९/०८० मा २१ सवारीसाधन दुर्घटनामा पर्दा १२ जनाले ज्यान गुमाएका थिए भने १३ जना घाइते भएका थिए । आ.व. २०८०/०८१ मा १८ सवारीसाधन दुर्घटनामा पर्दा १२ जनाले ज्यान गुमाएका थिए भने १३ जना घाइते भएका थिए ।

राजमार्ग तथा ग्रामीण भित्री सडकखण्डमा चल्ने विविध प्रकारका सवारीसाधनहरुको तीन वर्षमा तुलनात्मक रुपमा दुर्घटना घट्दै गएको तथ्यांक कार्यालयमा रहेको स्याङ्जा ट्राफिक प्रमुख नायब निरीक्षक पौडेलले बताए ।

स्याङ्जामा कार्यालयबाट खटेर कडा चेकजाँच तथा सवारी चालक र यात्रुलाई दिइएको जनसचेतनामुलक सन्देशका कारण पनि सडक दुर्घटना कम हुँदै गएको उनको भनाइ छ ।

उनले सवारी दुर्घटना हुनुको मुख्य कारण ट्राफिक नियमको उलंघनका साथ तीव्र गतिमा सवारी चलाउने तथा लापरबाही गरेर चलाउने देखिएको बताए ।

सवारी दुर्घटनाका कारण कतिपय ट्राफिक नियमको उल्लंघन रहेका छन् भने पुराना सवारीसाधन रहेकाले पनि सवारी कै कारण दुर्घटना भएको कार्यालयमा कार्यरत प्रहरी सहायक हवल्दार हेम बहादुर मल्लले जानकारी दिए । उनले स्याङ्जामा प्रायः ग्रामीण सडक रहेकोले घुम्ती मोड, खाल्डाखुल्डी र जिर्ण अवस्थामा रहेका सडकका कारण दुर्घटना हुने गरेको बताए ।

चालू आर्थिक वर्ष २०८१/२०८२ मा भने अहिलेसम्म ३ सवारीसाधन दुर्घटनामा पर्दा एकको मृत्यु भएको छ भने एकजना घाइते भएका छन् ।