अर्जुनचौपारीको दरौंखोलामा ८० हजार माछाका भुरा छाडिएको छ । विगतका वर्षहरुमा जस्तै यस वर्षमा पनि अर्जुनचौपारी गाउँपालिकाले विभिन्न जातका माछाका भुरा छाडेको हो ।

नेपालकै पहिलो तथा ठूलो जलविद्युत कालीगण्डकी ‘ए’ मत्स्य ह्याचरी सेवा, बेलटारी स्याङ्जाको सहयोगमा पालिकाले दरौंखोला, केवरेखोला र दिर्जेखोलामा गरि ठेड, गर्जी र हाडे जातका माछाका भुरा छाडेको हो ।

पालिका अध्यक्ष प्रकाश तिवारीले माछा पालनबाट आर्थिक आर्जनमा जोड्ने पालिकाको नीति तथा कार्यक्रम अनुसार प्रत्येक वर्ष खोलामा माछा भुरा छाड्दै आएको बताए । विभिन्न प्रजातिका माछाका भुराहरु हरेक वर्ष छोडिने र खोलालाई पालिकाको आर्जनका माध्यम बनाउने जानकारी दिए ।

तिवारीले धेरै ठाउँमा खोलालाई माछामार्फत आय आर्जनमा जोडिएको र विज्ञसङ्गको छलफल गरेर खोलामा माछाका भुरा हालेको बताए । खोलाको चार किलोमिटर क्षेत्रमा ६ ठाउँमा भुरस हालेको पालिकाले जनाएको छ ।

प्रमुख प्रशासकीय अधिकृत कौशल पाण्डेले खोलामा माछाका भुरा हालेसङ्गै पालिकाले कुनै पनि तवरले खोलाका माछा मार्ने कार्य निषेध गरिएको जानकारी दिए ।

परम्परागत रुपले माछा मारी जीविकोपार्जन गरिरहेका समुदाय तथा व्यक्तिहरुले समेत माछा मार्न नपाउने र दैनिक जीविकोपार्जनमा कठिनाई उत्पन्न हुने अवस्थामा राहत उपलब्ध गराउने पालिकाले जनाएको छ ।

पालिकाले जिल्ला प्रशासन कार्यालय, भीरकोट नगरपालिकाको कार्यालय र अर्जुनचौपारी प्रहरी चौकीलाई समेत माछा मार्न निषेध गरिएको विषयमा जानकारी गराउँदै आवश्यक सहयोगका लागि आग्रह गरेको छ ।

पालिकाको आग्रह र निर्देशन विपरीत माछा मारेको भेटिएमा वा खबर पाइएमा कानुनबमोजिम कारबाही गरिने पालिकाले जनाएको छ ।