पोखरा । नेपालमै पहिलोपटक अन्तर्राष्ट्रिय बेलुन महोत्सव पर्यटनको राजधानी पोखरामा हुँदैछ । पोखरालाई साहसिक खेलकुदको माध्यमबाट पर्यटन प्रवर्द्धन गर्ने उद्देश्यका साथ पोखरा पर्यटन परिषद् र बेलुन नेपाल प्रालिले क्रिसमस तथा अंग्रेजी नयाँ वर्ष अवसरमा महोत्सव तयारी गरेका हुन् ।

फेवाताल किनार फेवा फाँटमा यही ९–१७ पुससम्म महोत्सव हुने शनिबार आयोजित पत्रकार सम्मेलनमा परिषद् अध्यक्ष तारानाथ पहारीले जानकारी दिए । उनका अनुसार महोत्सवमा नेपालसहित १५ देशका अन्तर्राष्ट्रिय बेलुन पाइलटहरुले भाग लिने छन् । १७ वटा हट एयर बेलुन पोखराको आकाशमा उड्नेछन् ।

महोत्सव पामे क्षेत्रको लौरूकदेखि चंखपुरसम्म तीन किलोमिटर क्षेत्रमा आयोजना हुनेछ । फेस्टिभलमा अमेरिका, स्पेन, लिथुनिया, थाइल्याण्ड, भियतनाम लगायत मुलुकमा कम्पनीले भाग लिने बेलुन नेपालका अध्यक्ष विक्रम बाडेले बताए । बिहान ६ देखि ९ बजेसम्म ब्यावसायिक उडान हुनेछ भने साँझ विविध कार्यक्रम हुने उनले बताए । साँझ ४ देखि ६ बजेसम्म विभ्निन देशको प्रतिनिधित्व गर्दै बेलुन पाइलटले हट एयर बेलुनको उडान भर्ने छन् । राति ७ दखि ८ बजेसम्म बेलुन नाइट ग्लो तथा सांगीतिक कार्यक्रम हुने छन् ।

महोत्सवमा हरेक दिन सांगीतिक कार्यक्रम, फूड स्टल, मेला र विभिन्न खेल समेत हुनेछन् । महोत्सवमा राष्ट्रिय कलाकारहरू दीपक बज्राचार्य, राजु लामा, एलिना चौहान, कुमार सागर, कविता नेपाली, काटुन क्रूज, बेली नृत्य लगायत स्थानीय कलाकार र व्यान्डले सांगीतिक प्रस्तुति दिने छन् ।

महोत्सवमा करिब तीन हजार जनाले उडान भर्ने लक्ष्य आयोजकको छ । करिब तीन सय वटा गैरव्यावसायिक उडान हुनेछन् । हट एयर बेलुनमा सामान्यतः ४० मिनेटको लामो उडान हुने गर्छ । उडानमा मनोरम हिमशृङ्खलासहित, पोखराको दृश्यावलोकन एवं सूर्योदय र सूर्यास्त देख्न सकिनेछ ।

महोत्सव विशेष आकर्षणरुपमा सूर्योदय र सूर्यास्त बेलुन उडान : पोखराको फेवाताल, अन्नपूर्ण हिमाल र वरिपरिका गाउँको सुन्दर दृश्य, नाइट बेलुन ग्लो ः बेलुनहरू रातको आकाशमा झिलिमिली गर्दै, आगो खेल, क्रिसमस इभ, काठमाडौंको कुमारी नृत्य र बर्ज योगीनी लगायतका कार्यक्रम प्रस्तुत हुनेछन् ।

२४–२६ डिसेम्बरसम्म विभिन्न व्याण्डसहितको प्रस्तुति हुनेछ भने २७ देखि ३१ डिसेम्बरसम्म बेलुन उडान तथा विभिन्न सांस्कृतिक कार्यक्रम हुनेछ । सन् २०२५ को पहिलो दिन १ जनवरीमा सांगीतिक कार्यक्रम प्रस्तुतिसहित कार्यक्रम समापन हुनेछ । साथै महोत्सवमा विभिन्न खानाका परिकारसहितका अन्य केही स्टलहरु समेत रहने छन् ।

उक्त महोत्सवको स्थानीय संयोजक फेवा क्लब हो । बिवाईडीको मुख्य प्रायोजनमा हुने महोत्सव सफल पार्न पोखरा महानगरपालिका, नेपाल पर्यटन बोर्ड गण्डकी प्रदेश, उघोग तथा पर्यटन मन्त्रालय गण्डकी प्रदेश सरकार प्रवद्र्धकको रुपमा सहयोग गरेका छन् । क्रिजम्याटिक इन्टरटेन्मेन्ट महोत्सवको प्रमुख इभेन्ट व्यवस्थापक हो । उद्घाटनअघि पोखराको भकुण्डेदेखि विभिन्न जनजातिको भेषभुषा सहितको झाँकीसमेत प्रदर्शन हुनेछ ।

पोखरामा सन् २०१८ देखि व्यावसायिकरुपमा हट एयर बेलुन संचालन हुदै आएको थियो । महोत्सवको ब्रान्ड एम्बासडर राजेश हमाल र प्रियंका कार्की हुन् । पोखरा र यस आसपासका सम्भावित विभिन्न साहसिक खेलकुदको पहिचानसहित पोखरालाई साँच्चिकै साहसिक खेलकुदको गन्तव्य बनाउन यस कार्यकमले थप टेवा पुग्ने परिषद् अध्यक्ष पहारीले बताए ।

पत्रकार सम्मेलनमा गण्डकी प्रदेशका प्रेस रजिष्ट्रार बिमला भण्डारी, पोखरा अन्तर्राष्ट्रिय विमानस्थलका प्रबन्धक योगेन्द्र कुँवर, नेपाल पत्रकार महासंघ कास्कीका नवनिर्वाचित अध्यक्ष माधव बराल लगायतले बोलेका थिए ।

महोत्सवस्थलसम्म जानआउका लागि लेकसाइड डिहिकोपाटनबाट निःशुल्क सटल बसको व्यवस्था मिलाइएको छ ।