स्याङ्जाको कालीगण्डकी गाउँपालिका -३ आलम स्थित विर्घा-मिर्मी सडकखण्डमा ट्याक्टर दुर्घटना हुँदा एक जनाको मृत्यु भएको छ । दुर्घटनामा परि अन्य दुईजना घाइते भएको प्रहरीले जनाएको छ ।

आलमबाट विर्घातर्फ जाँदै गरेको ट्रली नभएको सिरक-डसना बनाउने मेसिन जोडेको लु ४ त ७८३१ नम्बरको ट्याक्टर पक्की भित्री सडकखण्डमा मंगलबार साँझ करिब ७ : ४५ बजे दुर्घटना भएको जिल्ला प्रहरी कार्यालय स्याङ्जाले जनाएको छ ।

दुर्घटनामा परि मृत्यु हुनेमा बारा जिल्ला गढीमाई नगरपालिका -११ का अन्दाजी २२ वर्षीय सब्दुल अन्सारी रहेका छन् । ट्याक्टरले च्यापेको अवस्थामा अन्सारीलाई उद्दार गरि उपचारका लागि मिर्मी स्थित कालीगण्डकी अस्पताल पठाइएकोमा डाक्टरले मृत घोषणा गरेको जिल्ला प्रहरी कार्यालय स्याङ्जाका प्रहरी निरीक्षक उमेशलाल श्रेष्ठले जानकारी दिए ।

ट्याक्टर अनियन्त्रित भई सडक देखि करिब ४० मिटर तल खस्दा दुर्घटना भएको निरीक्षक श्रेष्ठले बताए । उनले दुर्घटनामा परि ट्याक्टरमा सवार अन्य दुईजना समेत घाइते भएको बताए ।

बारा कलैया उपमहानगरपालिका वडा नं. -१० बस्ने २४ वर्षीय अर्जुन शाह र बारा गढीमाई नगरपालिका वडा नं.-११ बस्ने अन्दाजी २६ वर्षीय सलाम मुदिन मन्सुरी दुर्घटनामा परि घाइते भएका हुन् । घाइते दुवैको टाउको र शरिरका विभिन्न भागमा चोट लागेको प्रहरीले जनाएको छ । उनीहरूको मिर्मी कालीगण्डकी अस्पतालमा सामान्य उपचार पश्चात् थप उपचारका लागि लुम्बिनी मेडिकल कलेज प्रभास, पाल्पा रिफर गरिएको प्रहरी निरीक्षक श्रेष्ठले जानकारी दिए ।

दुर्घटनामा बारा गढीमाई न.पा.-११ बस्ने १४ वर्षीय सिकन्दर यादव सकुशल रहेको जिल्ला प्रहरी कार्यालय स्याङ्जाले जनाएको छ । ट्याक्टर चालक गुल्मी कालीगण्डकी गाउँपालिका -२ अर्बेनी बस्ने २६ वर्षीय सन्दिप वि.क. दुर्घटना पश्चात् फरार रहेको र उनको खोजतलास भइरहेको प्रहरी निरीक्षक श्रेष्ठले बताए ।