पोखरा १६ बाटुलेचौरका ८४ वर्षका फौदबहादुर बस्नेत क्षेत्रीलाई साइकल सिटी पोखराले सातौं टुर दि पोखराको अवसरमा सम्मान गरेको छ ।

स्वास्थ्य, वातावरण र पर्यटन प्रर्वद्धनका लागि साइकल भन्ने मूलनारासहित साइकल सिटी पोखराले शनिबार आयोजना गरेको साइकल र्‍यालीको अवसरमा बस्नेतलाई यो उमेरसम्म पनि निरन्तर साइकल चलाउँदै आएकोमा सम्मान गरेको हो ।

६३ वर्षदेखि लगातार साइकलमै यात्रा गर्दै आइरहेका बस्नेतले अहिले २६ वर्ष अघि किनेको साइकल चलाउँदै आएका छन् । ८० वर्षको उमेरमा गोडामा समस्या भएपनि चौरासी पूजा गरिसक्दासमेत उनमा साइकलप्रतिको मोह घटेको छैन ।

भारतमा ३५ वर्ष साइकल कम्पनीमा सेवा गरेका बस्नेत त्यसअघि नेपाल आर्मीमा रहँदा २०१७ सालदेखि नै साइकल चलाउन थालेका थिए ।
फौदबहादुरको साइकलप्रतिको मोहको कदर गर्दै साइकल सिटी पोखराल सम्मान गरेको साइकल सिटी पोखराका अध्यक्ष श्यामकृष्ण श्रेष्ठले बताए ।

उनलाई गण्डकी प्रदेशका सामाजिक विकास तथा खेलकुद मन्त्री विन्दुकुमार थापा, प्रमुख प्रायोजक घरपझोङ गाउँपालिका, मुस्ताङका अध्यक्ष मोहनसिंह लालचनले दोसल्ला ओढाएर सम्मानपत्र प्रदान गरेका थिए ।

पोखरामा आयोजित ७ औं ‘टुर दी पोखरा साइक्लिङ र्‍यालीमा काठमाडांै, भक्तपुर, ललितपुर, स्याङ्जा, मुस्ताङ, पोखरासहित केही विदेशीको समेत सहभागिता रहेको जनाइएको छ ।

¥यालीमा करिव ५ सय बढी साईकलिस्टले स्वास्थ्य, वातावरण र पर्यटन प्रर्वद्धनात्मक सन्देशसहित पोखरा बजार परिक्रम ग¥यो ।

पोखरा सभागृह चोकबाट सुरु भएको टुर दि पोखरा साइकल र्‍यालीले पृथ्वीचोक, अमरसिंह चोक, रामबजार, महेन्द्रपुल, बगर, जिरो किलोमिटर, सृजनाचोक हुँदै पुनः सभागृह चोकमा पुगेर अन्त्य भएको थियो । र्‍याली अघि साइक्लिङ विधामा योगदान दिएका बस्नेतसहितका विभिन्न व्यक्तिहरुलाई सम्मान गरिएको हो ।