रोटरी क्लव अफ पोखरा न्यूरोड, रोटरी क्लव अफ नक्साल शक्ति र रोटरी क्लव अफ पोखरा क्यापिटलको संयुक्त आयोजना तथा गण्डकी मेडिकल कलेजको प्राविधिक सहयोगमा भिआईए परीक्षण गरिएको छ ।

पोखरा ७, घारीपाटन वरपरका महिलाहरुले निशुल्क पाठेघरको मुखको भिआईए परिक्षण गराई स्वास्थ्य लाभ लिएका छन् ।

रोटरी क्लव अफ पोखरा न्यूरोडका अध्यक्ष दीपेन्द्र शर्माको अध्यक्षतामा भएको उक्त कार्यक्रममा प्रमुख अतिथि वडा नं. ७ का अध्यक्ष राममोहन आचार्य थिए ।

कार्यक्रममा रोटरी क्लव अफ पोखरा क्यापिटलका अध्यक्ष सन्तोष शाहीले स्वागत मन्तव्य, पोखरा ७, शहरी स्वास्थ्य केन्द्रकी सिअनमी अनिता शर्माले भिआईए सम्बन्धमा र रोटरी क्लव अफ पोखरा न्यूरोडका संस्थापक अध्यक्ष रवि प्रसाद बरालले रोटरीको बारेमा र क्यान्सर रोगको बारेमा मन्तव्य राखेका थिए । कार्यक्रम सञ्चालन पोखरा क्यापिटलका सचिव विजय बरालले गरेका थिए ।

रोटरीले गर्ने कार्यक्षेत्रहरु मध्ये मातृ तथा बाल स्वास्थ्य अन्तर्गत पोखरा र यस वरपरका क्षेत्रका करिव १५ सय महिलाहरुको भिआईए परिक्षण गर्ने योजना रहेको रोटरी क्लव अफ पोखरा क्यापिटलका अध्यक्ष सन्तोष शाहीले जानकारी दिए ।

‘रोटरी क्लव एक विशुद्ध सेवामूलक अन्तराष्टिय सामाजिक संस्था हो । जसले सामाजिक र मानविय उत्थानको लागि आफ्नो स्वार्थ माथि उठेर विविध सामाजिक क्रियाकलाप सञ्चालन गर्दै आइरहेको छ ।’ उनले भने ।

विश्वकै सबैभन्दा पुरानो र विश्वसनिय सेवामुलक संस्था रोटरी अमेरिकामा सन् १९०५ मा स्थापना भई संसार भरी यसको संजाल फैलिएको छ । हाल पोखरामा रोटरीका १० ओटा क्लव रहेका छन् ।