पोखरा । २४ औं आहा ! रारा पोखरा गोल्डकप फुटबल प्रतियोगिताको सर्वाधिक सफल टोली‌ मध्येको एक नेपाल पुलिस क्लब सेमिफाइनलमा प्रवेश गरेको छ।

जारी प्रतियोगिताको पहिलो क्वार्टरफाइनलमा शनिबार ब्रिगेड ब्वाइज एफसीलाई २-० ले हराउँदै पुलिस अन्तिम चारमा पुगेको हो। यसअघिका ३ प्रतियोगिताको पहिलो खेलमै पराजित पुलिसले यस प्रतियोगितामा सम्भावना कायम राखेको हो ।

पुलिसलाई जीत दिलाउन विवेक पाण्डे र कप्तान राम बाजीले गोल गरे।

विवेकले २८ औं मिनेटमा कर्नरमा गोल गर्दैै टोलीलाई अघि बढाए। ४० औं मिनेटमा विवेककै कर्नरमा रामले हेड मार्फत गोल गर्दै टोलीको अग्रता दोब्बर पारे ।

पुलिस पहिलो खेलमा आयोजक सहारा क्लबलाई १-० ले हराउँदै अन्तिम आठको यात्रा तय गरेको थियो ।

पुलिसले सेमिफाइनल फाइनलमा चर्च ब्वाइज युनाइटेड र साविक विजेता त्रिभुवन आर्मी फुटबल क्लबमध्ये एकसँग खेल्ने छ।

पुलिसले २०५८ (काराभान गोल्डकप) सहित २०५९, २०६४,२०६५, २०६६ र पछिल्लो पटक २०७४ मा गरि ६ पटक आहा ! रारा गोल्डकपको उपाधि जितेको थियो।

प्रतियोगितामा आइतबार मच्छिन्द्र फुटबल क्लब र ५ पटकको विजेता थ्री स्टार क्लबबीच दोस्रो क्वाटरफाइनल खेल हुनेछ।

यसपटक प्रतियोगिताको विजेताले १२ लाख १ हजार र दोस्रो हुने टोलीले ६ लाख १ हजार रुपैयाँ प्राप्त गर्नेछ। आहा ! राराको खेल हाम्रो खेलकुदको युट्युब च्यानलबाट प्रत्यक्ष प्रसारण गरिएको छ।