स्याङ्जा जिल्ला उद्योग वाणिज्य संघको आयोजनामा जिल्लाकै गरिमा बोकेको आँधीखोलाको काख पुतलीबजार नगरपालिका – १ मालेबगरमा आजदेखि स्याङ्जा महोत्सव सुरु भएको छ । फागुन १८ गतेसम्म सञ्चालन हुने सातौं स्याङ्जा महोत्सवको उद्घाटन नेपाल सरकारका संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले गरेका छन् ।

महोत्सव उद्घाटन गर्दै मन्त्री पाण्डेले देशलाई समृद्धिको बाटोतर्फ लैजान सरकारका साथमा निजि क्षेत्र अगाडि आउनुपर्ने बताएका छन् । सोही उद्घाटन कार्यक्रममा निजि क्षेत्रका पूंजीलाई सरकारले उच्च महत्त्व दिएको बताउँदै मन्त्री पाण्डेले लगानीमैत्री वातावरण बनाउन र देशभित्रको पूंजी देशमै परिचालन गराउन निजि क्षेत्रको भूमिका अत्यावश्यक रहने बताएका छन् ।

मन्त्री पौडेलले महोत्सवहरुलाई व्यापारिक दृष्टिकोणबाट मात्र नभई वैचारिक दृष्टिकोणले उपयोग गर्न वाणिज्य संघलाई सुझाएका छन् । स्याङ्जा राजनीतिक तथा प्रशासनिक क्षेत्रमा नेतृत्वदायी जिल्ला रहेको बताउँदै पर्यटकीय, धार्मिक क्षेत्र लगायत धेरै क्षेत्रमा सम्भावना बोकेको जिल्ला रहेको जिकिर गरे ।

महोत्सवमा राष्ट्रिय स्तरका चर्चित कलाकारहरुवाट स्टेज सो, बाल उद्यान, औद्योगिक व्यापार मेला, लोक दोहोरी गीत प्रतियोगिता, विद्यालय स्तरीय नृत्य प्रतियोगिता, पञ्चेबाजा प्रतियोगिता, रितिरिवाज झल्कने सांस्कृतिक कार्यक्रम, महिला विशेष कार्यक्रम अन्तर्गत परम्परागत रत्यौली गित प्रतियोगिता, मम्मी डान्स (आमा एकल नृत्य) प्रतियोगिता, लोक भजन प्रतियोगिता, ख्याती प्राप्त कलाकारहरुबाट दैनिक प्रस्तुती, सुगम संगितलगायत थुप्रै मनोरञ्जनात्मक कार्यक्रमहरुको रुपमा प्रस्तुती समेत रहेका छन् ।

फागुन १८ गतेसम्म चल्ने महोत्सवमा ३ लाख पचास हजारभन्दा बढि दर्शकले मेला अवलोकन गर्ने र करिब ८ करोड बरावरको व्यापारिक कारोबार हुने अपेक्षा गरिएको छ ।

महोत्सवमा करिब एक करोड एक लाख आम्दानी हुने र महोत्सव सम्पन्न गर्नका लागि करिब ९५ लाख बीस हजार खर्च भई पाँच लाख ८० हजार बचत हुने अनुमान गरिएको छ ।

र्‍यालीसहित सुरु गरिएको महोत्सव समुद्घाटनमा विभिन्न जातजाति, धर्म, सम्प्रदाय तथा संघ संस्थाका मौलिक सांस्कृति झल्कने सांस्कृतिक कार्यक्रमहरु, झाँकीहरू समेत प्रस्तुत गरिएको थियो ।