पोखरा । त्रिभुवन विश्वविद्यालयअन्तर्गत देशकै ठूलो आंगिक क्याम्पसमा १६ वर्षपछि आगामी चैत ५ मा स्वतन्त्र विद्यार्थी युनियन (स्ववियु) निर्वाचन हुँदैन । हालसम्म निर्वाचन रोकिने कुनै परिस्थिति देखिएको छैन र माहोल चुनावमैत्री नै छ । यो निर्वाचनमा अनेरास्ववियुका विष्णु पोख्रेलको प्यानलबाट सचिव पदमा विराट दुवाडी उम्मेद्वार छन् ।

को हुन् विराट ?

विराट २०५५ साल असार २४ गते पोखरा महानगरपालिका–५ मालेपाटनमा जन्मिएका हुन् । उनी अनेरास्ववियु पोखरा महानगर कमिटीको संस्थापक सचिव हुन् । अहिले विराट अनेरास्ववियु पृथ्वीनारायण क्याम्पस कमिटी संयोजक छन् । विराट बी.एल.एल.बी उत्तीर्ण भइसकेका छन् । उनी पढाइमा पनि उत्कृष्ट छन् । एस.एल.सीमा उनले ८९ प्रतिशत प्राप्त गरेका थिए । त्यस्तै जिल्ला स्तरीय कक्षा ८ को परीक्षामा ८७ प्रतिशत अंक ल्याएका थिए ।

विराट विद्यार्थीका मुद्दा निरन्तर उठाउने विद्यार्थी नेतामध्ये एक हुन् । पृथ्वीनारायण क्याम्पसमा होस्टेल निर्माण नभएसम्म कुनै भौतिक पूर्वाधारको काम अघि बढ्न नदिने अनेरास्ववियुको अडानपछि होस्टल निर्माणको प्रक्रिया अघि बढेको छ । व्यायमशालाका लागि ध्यानाकर्षण गराउने, पोखराकै पुरानो रंगशाला अन्नपूर्ण रंगशाला व्यवस्थित बनाउनुपर्ने, त्यस छेउछाउलाई सुरक्षित बनाउन कुलोमा स्ल्याब बनाउन विज्ञप्ती निकालेर उनकै नेतृत्वमा अनेरास्ववियुले माग गरेको थियो । यसपछि क्याम्पस प्रशासनले यसको सम्बोधन ग¥यो ।

विराट क्रिकेटर पनि हुन् । त्यसैले खेलप्रति उनको औधि रूचि छ । उनी क्रिकेटका जिल्ला लिगको च्याम्पियन टिमका सदस्य हुन् । गत फागुन पहिलो हप्ता कास्की जिल्लास्तरीय टी–ट्वान्टी लिग भएको थियो । त्यसमा ओपनर विराट सांग्रिला क्रिकेट टिमबाट खेलेका थिए । यो टिम लिग च्याम्पियन बनेको थियो ।

खेलप्रति रूचि भएकै कारण उनले क्याम्पसभित्र पनि खेलकुद र खेल पूर्वाधारका विषयलाई बलियो गरेर उठाउँदै आएका छन् । पृथ्वीनारायण क्याम्पसमा खेलिने खेलका लागि महिनामा चार दिन भएपनि प्रशिक्षक ल्याउनुपर्छ भन्ने माग विराटको नेतृत्वमा अनेरास्ववियुले क्याम्पससँग गरेको थियो । क्याम्पसभित्रका खेल क्लबलाई एउटा पीएन क्याम्पसको क्लब भनेर समाहित गरेर जिल्ला संघमा दर्ता गराइनुपर्ने आवाज पनि उनले उठाउँदै आएका छन् । यसबाहेक क्याम्पसले खेलबापतको शुल्कको प्रभावकारी प्रयोग हुनुपर्नेमा उनको जोड रहँदै आएको छ ।

क्याम्पसभित्रका रेड जोनमा परेका भवन बनाउन ध्यानाकर्षण पनि अनेरास्ववियुले प्रशासनलाई गराएको छ । विराट र अनेरास्ववियुको पहलमा महिलाहरूका लागि स्यानिटरी भेन्डिङ मेसिन र कोठाको व्यवस्थापन भएको छ ।

शिक्षा संकायलाई मर्ज गर्न, मनिपाल कलेजले अतिरिक्त शुल्क लिँदा त्यसको विरोधमा भएको आन्दोलनमा, नमुना संसद कार्यक्रम गर्न विराट सक्रियता साथ लागेका थिए । यसबाहेक अनेरास्ववियु गण्डकीले पृथ्वीनारायण क्याम्पसमा आयोजना गरेको प्रदेशस्तरीय भलिबल प्रतियोगिता र अनेरास्ववियु कास्कीले आयोजना गरेको विद्यार्थी महोत्सव सफल पार्न पनि विराट सक्रिय थिए ।

उनी विद्यार्थीलाई कक्षाकोठामा हप्ताको ६ दिन नै राखेर सैद्धान्तिक विषय रटाउने कामको विपक्षमा रहँदै आएका छन् । विराट हप्ताको बढीमा ३ दिन पढाइ हुनुपर्ने र त्यसबाहेक अन्य समयमा काम गर्ने वातावरण बनाइनुपर्ने मत राख्छन् । ‘स्नातक र स्नातकोत्तरमा दिउँसो पनि पढ्नुपर्छ जसले गर्दा उनीहरू जीवनको सबैभन्दा महत्वपूर्ण कालखण्डमा पढ्न मात्र परेको छ, व्यावहारिक सिकाइबाट टाढिनुपरेको छ,’ उनले भने, ‘विद्यार्थीले हप्तामा ३ दिन पढ्ने र त्यसपछि अरु समय काम गर्ने वातावरण बनाइनुपर्ने विषय म सचिव निर्वाचित भएपछि उठाउँछु ।’

संगठनभित्र विराटले अनेरास्ववियुबाट स्ववियु अध्यक्षमा दाबी गरेका थिए । तर, संगठनको आग्रहलाई सहजै स्वीकार्दै उनी सचिव लड्न तयार भए । उनको यो कदमको नेकपा एमाले र अनेरास्ववियुभित्र निकै प्रशंसा भइरहेको छ ।