पोखरा । नेपाली नयाँ वर्षका अवसरमा पोखराको फेवाताल किनारमा २० औँ फेवा नव वर्ष महोत्सव हुने भएको छ ।

होटल संघ पोखराले सोमबार पत्रकार सम्मेलनको आयोजना गरी महोत्सव यही ३० चैत देखि आगामी वैशाख १ गतेसम्म पर्यटकीय क्षेत्र ड्यामसाइडदेखि खहरेचोकसम्मको सडकमा हुने जनकारी दिएको हो ।

नेपाली संस्कृतिको संरक्षण र परम्परागत नेपाली खाना तथा आन्तरिक एवं बाह्य पर्यटन प्रवद्र्धन गर्न विविध सांस्कृतिक कार्यक्रमसहित महोत्सव गर्न लागेको महोत्सवका संयोजक एवं संघका अध्यक्ष लक्ष्मण सुवेदीले जनकारी दिए ।

उनका अनुसार महोत्सवको अवसरमा होटल संघ पोखरा मातहतका होटलहरुले प्रकाशित गरेको दररेटमा २० प्रतिशतसम्म छुट प्रदान गरिने छ ।

महोत्सवकै प्रचारका लागि संघले हालै पूर्वी नेपालमा जाउँ है पोखरा अभियान सम्पन्न गरेको र पश्चिम नेपालमा पनि यस्तो अभियान छिटै संचालन गरिने पनि उनले जानकारी दिए ।

महोत्सव सफल बनाउनका लागि विभिन्न २१ वटा समिति तथा उप–समितिहरु गठन गरिएको छ ।

महोत्सवमा निःशुल्क प्रवेशको व्यवस्था गरिएको छ । रैथाने र परम्परागत खानाको प्रदर्शनी, सांस्कृतिक कार्यक्रम, मनोरञ्जन र खेलकूदका कार्यक्रम, पर्यटक दौड, पप कन्सर्ट, कृषि र हस्तकलाका सामग्रीको प्रर्दशनी र लोकदोहोरीका कार्यक्रम महोत्सवका प्रमुख आकर्षण रहने छन् ।

पत्रकार सम्मेलनमा नेपाल पर्यटन बोर्ड गण्डकीका प्रमुख मणिराज लामिछानेले फेवा महोत्सवले पोखराको पर्यटन प्रवद्र्धनमा टेवा पुग्ने बताए । संघको सल्लाहकार परिषद्का सदस्य एवं होटल संघ नेपालका केन्द्रिय सदस्य भरतराज पराजुलीले सकारात्मक माहोलले पर्यटनलाई अगाडि बढाउन मद्दत पुग्ने भनाई राखे । नेपाल पत्रकार महासंघ कास्कीका अध्यक्ष माधव बरालले महोत्सवको सफलताको कामना गर्दै पोखरा आउने पर्यटकको तथ्यांक राख्न सम्बन्धित संस्थालाई सुझाव दिए ।