पोखरा वडा नं. ५, पर्स्याङस्थित शान्ति निकेतन स्कूलले नयाँ शैक्षिकसत्रको पूर्वसन्ध्यामा शैक्षिक अभिमुखीकरण कार्यक्रम आयोजना गरेको छ ।

विद्यालयका शिक्षण गतिविधिहरुलाई प्रभावकारी बनाउने उद्देश्यले आयोजना गरिएको अभिमुखीकरण आयोजना गरिएको विद्यालयले जनाएको छ ।

प्रमुख वक्ता राष्ट्रिय परीक्षा बोर्ड, गण्डकी प्रदेश परीक्षा व्यवस्थापन कार्यालय, पोखराका पूर्व प्रमुख दीपेन्द्र ढकालले शिक्षकको प्रभावकारी भूमिका अनिवार्य रहेको र समयसापेक्ष बालमैत्री वातावरण निर्माण गरी पठनपाठन हुनुपर्नेमा जोड दिएका थिए ।

पोखरा महानगरपालिका, शिक्षा महाशाखा अधिकृत रामप्रसाद तिवारीले विद्यालयको शैक्षिक उपलब्धिको खुलेर प्रशंसा गर्दै अब भौतिक संरचना निर्माणसँगै स्कुलको सफलताको यात्रा अघि बढ्ने विश्वास लिए ।

स्कूलका संस्थापक प्राचार्य डा. महेश्वर पराजुलीले अत्याधुनिक प्रविधिमैत्री भवन निर्माण गर्न लागेको जानकारी दिँदै विद्यालयले आफ्नो गौरवमय इतिहास र विरासतलाई निरन्तरता दिँदै समावेशी, समतामूलक समाज निर्माणमा विद्यार्थी केन्द्रीत शिक्षा प्रणाली अवलम्वन गरिने बताए ।

विद्यालयले ६० करोड बजार मूल्यको जग्गामा १५ करोड लगानीमा ५ तले भवन निर्माण गर्दैछ । नयाँ वर्षकै दिन सोमबार भवनको शिलान्यास भइसकेको छ भने यही वर्षभित्र निर्माण सक्ने लक्ष्य छ ।

शान्ति निकेतन स्कुलको नयाँ भवन बागलुङ राजमार्गबाट १०० मिटर भित्र पोखरा ५ को धारापानीमार्गमा बन्न लागेको हो । पूरानो भवनमा मन्टेश्वरी तहदेखि कक्षा ३ सम्मका विद्यार्थीहरूका लागि पठनपाठन सञ्चालन भइरहेको छ भने नयाँ भवनमा कक्षा ४ देखि कक्षा १२ सम्म पठनपाठन हुनेछ । आगामी २०८३ सालदेखि कक्षा १२ सम्मको पाठ्यक्रम विस्तार गरिनेछ ।

सम्बन्धित समाचारः

शान्ति निकेतनले १५ करोड लागतमा अत्याधुनिक सुविधायुक्त भवन बनाउँदै