पोखरा । गाउँपालिका राष्ट्रिय महासंघ नेपाल, गण्डकी प्रदेश कार्यसमितिले नवौं घुम्ती बैठक क्व्होलासोथर गाउँपालिका स्थित घले गाउँमा शनिवार सम्पन्न गरेको छ । बैठकमा बोल्ने अधिकांशले स्थानीय सरकारका समस्या र गुनासोलाई पोखे ।

दुध पोखरी गाउँपालिका अध्यक्ष धनप्रसाद गुरुङले कर्मचारीका कारण सास्ती खेप्नुपरेको गुनासो गरे । ‘नयाँ नयाँले काम बरु अलिक गर्छ तर अनुभवी भनेर ल्यायो आउँछ न टेर्छ न सोध्छ केही भन्यो भने विदा बसिदिन्छ’, उनले भने । विकट गाउँपालिकाहरुमा कर्मचारीहरुको अभाव कै कारण सहज रुपमा सेवा प्रवाह गर्न नसकिएको उनको भनाई थियो ।

जलजला गाउँपालिका अध्यक्ष राजु आचार्यले प्रदेश सरकारको योजना बैंकमा पालिकाले निर्णय गरेका योजना मात्रै समावेश गराउनुपर्ने बताए । ‘कसले हालेको पनि थाहा छैन , किन हालेको पनि थाहा छैन , योजनाको दोहोरोपन र स्थानीय आवश्यकताको आधारमा मात्रै योजनाहरुमा बजेट विनियोजन’, उनले भने ।

क्व्होलासोथर गाउँपालिका अध्यक्ष सूर्य गुरुङ पर्यटन शुल्क वापत एक्याप लगायत विभिन्न निकायमा उठाइएको रकमलाई सदुपयोग गर्न आवश्यक रहेको बताए ।
‘पैसा उठाउने र लगेर थुपार्ने तर त्यसको सहि उपयोग भएको देखिदैन त्यो पुँजीलाई स्थानीय पर्यटन प्रर्वद्धनमा लगाउनुपर्दछ’, उनले भने ।

बैठकमा बोल्दै केन्द्रिय महासचिव खिम बहादुर थापाले स्थानीय सरकारले आफ्ना अधिकारलाई सहि ढंगबाट उपयोगमा जोड दिए । उनले स्थानीय सरकार नै जनताको नजिकको सरकार भएकाले जनताको अपेक्षा स्थानीय सरकारसंग बढि रहेको बताए । ‘जनताहरु अपेक्षा हामीसंग धेरै छ, अप्ठ्यारो छ संगै अवसरपनि त्यत्तिकै रहेको छ ’, उनले भने ।

स्थानीय सरकारका समस्याहरुको पक्षमा निरन्तर गाउँपालिका राष्ट्रिय महासंघ नेपालले पैरवी गर्दै आएको बताउँदै उनले बैठकबाट उठेका समस्या समाधानका लागी केन्द्र र प्रदेश सरकारसंग आवश्यक समन्वय गरिने प्रतिवद्धता व्यक्त गरे ।

कोषाध्यक्ष उमेश भट्टले नीति तथा कार्यक्रम र बजेटलाई व्यापक छलफल र परामर्शबाट कार्यान्वयनमा लैजान सुझाव दिए । ‘नीति कार्यक्रम र बजेट झ्यापझुप ल्याउने र पास गराउने होइन, व्यापक छलफल गर्ने सुझाव ग्रहण गर्ने आवश्यक परे संशोधन गराउने र पास गर्ने हो ’, उनले भने ।

बैठकमा महासंघका केन्द्रिय सदस्य लोक बन्जरा, रिता देवकोटा लगायतले गाउँपालिका महासंघ गाउँपालिकाहरुको साझा संस्था रहेको बताउँदै गाउँपालिकाहरुको स–साना समस्याहरुलाई सम्बोधन गर्न लागि परिरहेको बताए ।

गाउँपालिका महासंघ गण्डकी अध्यक्ष नवराज ओझाले स्थानीय सरकारलाई संकुचित बनाउने गरी जारी हुने ऐन, नियमावली स्विकार्य नहुने बताए । उनले प्रदेश सरकारले बनाएका कानुन र नियमावलीलाई छलफल गरी आवश्यक सुझाव महासंघको तर्फबाट दिईने बताए ।

बैठकले गण्डकी प्रदेश सरकारको आगामी आ।वको नीति तथा कार्यक्रमका लागी आवश्यक सुझाव संकलनका लागी उपसमिति गठन गरेको छ । यस्तै समानिकरण र विशेष लगायतको बजेट अन्तिम किस्ता पूर्ण रुपमा निकासा दिनको लागी संघ र प्रदेश सरकारको ध्यानाकर्षण गराउने लगायतका निर्णहरुले बैठकले गरेको छ ।

महासंघ सचिव जोकलाल बुढाले संचालन गरेको बैठकमा प्रदेश उपाध्यक्ष हिरादेवी शर्माले स्वागत गरेकी थिइन् ।

महासंघले हरेक तीन महिनामा फरक फरक जिल्लाका गाउँपालिकामा घुम्ती बैठक मार्फत स्थानीय पालिकाहरुका सवाल र समस्याका विषयमा छलफल समेत गर्दै आएको छ ।