पोखरा महानगरपालिका वडा नम्बर ४ का अध्यक्ष देवकृष्ण पराजुलीलाई ३ दिनको लागि हिरासतमा राख्न जिल्ला प्रशासन कार्यालय कास्कीले अनुमति दिएको छ।

महानगरपालिकाका आर्थिक प्रशासन महाशाखाका अधिकृत ईश्वरीप्रसाद पोख्रेल र व्यवसायी लेखनाथ सुवेदीसँग अभद्र व्यवहार तथा हातपात गरेको आरोपमा बुधबार पक्राउ परेका पराजुलीविरुद्ध अभद्र व्यवहार सम्बन्धी मुद्दामा अनुसन्धानका लागि म्याद थप गरिएको हो।

मंगलबार महानगर प्रमुख प्रशासकीय अधिकृतको कार्यकक्षमै प्रशासनका अधिकृत पोख्रेलमाथि वडाध्यक्ष पराजुलीले हातपात गरेका थिए। त्यसैदिन फुटपाथमा सामान राखेको विषयमा विवाद हुँदा उनले व्यवसायी सुवेदीसँग पनि हातपात गरेका थिए।

घटनापछि आक्रोशित भएर महानगरका कर्मचारीहरूले बुधबार सेवा प्रवाह बन्द गरेका थिए। उता, व्यवसायी सुवेदीले पराजुलीविरुद्ध प्रहरीमा उजुरी दिएका थिए, जसको आधारमा उनलाई पक्राउ गरिएको हो।