पोखरा । नेकपा एमालेका स्थायी कमिटी सदस्य तथा गण्डकी प्रदेशका निवर्तमान मुख्यमन्त्री खगराज अधिकारीले मदन भण्डारीको असल उत्तराधिकारी पार्टी अध्यक्ष केपी शर्मा ओली भएको बताएका छन् ।

नेकपा एमाले जिल्ला कमिटी कास्कीले ३२ औं मदन आश्रित स्मृति दिवसको सन्दर्भमा शनिबार पोखरामा आयोजना गरेको कार्यक्रममा बोल्दै उनले यस्तो बताएका हुन् । ‘जनताको बहुदलीय जनवादका प्रतिपादक जननेता मदन भण्डारीले नेपालका कम्युनिस्ट तथा लोकतान्त्रिक आन्दोलनलाई उचाइमा पुर्‍याए,’उनले भने, ‘मदन भण्डारीको असल उत्तराधिकारी पार्टी अध्यक्ष केपी शर्मा ओली हो ।’

उनले राष्ट्रियताको रक्षा र देशको समग्र विकासमा सरकारले ध्यान दिएको बताए । एमाले अध्यक्ष ओली नेतृत्वको वर्तमान सरकारले जनतामा आशा जगाएको समेत उनले दावी गरे । अधोगतिमा लागेको अर्थतन्त्रलाई सुधारको लागि प्रयास भएको उल्लेख गर्दै उनले सरकारले सडक पूर्वाधार, विमानस्थल लगायत गौरवयोग्य काम गरेको उल्लेख गरे ।

वर्तमान परिस्थितिमा जनताको बहुदलीय जनवाद विषयक प्रवचन सहितको कार्यक्रममा स्थायी कमिटी सदस्य अधिकारीले ज्येष्ठ कम्युनिस्टले बनाएको जस्तै अवस्थामा अहिले पार्टी रहेको सुनाए । सोही कार्यक्रममा नेपालको कम्युनिस्ट आन्दोलनमा योगदान पुर्‍याएका ३ सय ५० ज्येष्ठ कम्युनिष्टहरूलाई सम्मान गरिएको थियो ।

यस्तै, पोखरा महानगरपालिका–१६ खोलाखेतस्थित मदन –आश्रित पार्क सरसफाइ, शालिकमा माल्यार्पणसँगै जवजको विशेषता वाचन कार्यक्रम गरिएको छ ।

यसैगरी, ३२ औं मदन आश्रित स्मृति दिवसको सन्दर्भमा मदन भण्डारी स्पोर्ट्स एकेडेमी गण्डकी प्रदेश कमिटीको आयोजनामा शनिबार निशुल्क आँखा शिविर सम्पन्न भयो ।