पोखरा । `रक्तदान जीवनदान, जीवनदान महादान´ भन्ने नाराका साथ जुरेभूमि युवा क्लब, मादी गाउँपालिका–६ ले रक्तदान कार्यक्रम आयोजना गर्ने भएको छ ।

जेठ १७ गते शनिबार बिहान ७ बजे पोखरा महानगरपालिका–१३ स्थित काहुँखोलाको तल्लो बसपार्कमा कार्यक्रम हुने सल्लाहकार समिति सदस्य रबि क्षेत्रीले जानकारी दिए । कार्यक्रममा गण्डकी प्रदेश सभा सदस्य तथा पूर्वमन्त्री बेदबहादुर गुरुङ (श्याम) प्रमुख अतिथि रहने क्लबले जनाएको छ । कार्यक्रममा एक सयभन्दा बढी रक्तदाता सहभागी हुने आयोजकले बताएको छ ।

क्लबले यस कार्यक्रमलाई समाजमा मानवता र सेवाको भावना फैलाउने उद्देश्यले आयोजना गरेको क्षेत्रीले बताए । यस अभियानलाई सफल बनाउन क्लबले कार्यसमिति सदस्य, सल्लाहकार, स्थानीय बुद्धिजीवी, समाजसेवी र स्वेच्छिक रक्तदाताहरूलाई सक्रिय सहभागिताको लागि आग्रह गरेको छ।

जुरेभूमि युवा क्लब सामाजिक काममा निरन्तर सक्रिय रहँदै आएको क्लब हो र यसपटकको रक्तदान कार्यक्रमलाई पनि उदाहरणीय बनाउने  क्लबको तयारी छ ।