पोखरा । गत जेठ १२ गते रातको समयमा १०ः५० बजेतिर पोखराको सभागृहचोक–सिर्जनाचोक सडकखण्डमा एक यौनिक अल्पसंख्यक व्यक्ति सवारीको ठक्करबाट घाइते भए ।

घाइते हुनेमा कास्कीको मादी गाउँपालिका वडा नं. ५ सिक्लेस घर भएका ईच्छा क्षेत्री भनेर चिनाउने विष्णु बहादुर बुढाथोकी हुन् ।

तत्काल वडा प्रहरी कार्यालय बैदाम कास्कीबाट खटिएको प्रहरी टोलीले उनलाई अस्पताल पठायो । तर, दुई दिनपछि जेठ १४ गते बुधबार उपचारकै क्रममा उनको निधन भयो ।

‘हिट एण्ड रन’ केसमा संलग्न स्कूटर चालक बुधबार पक्राउ परे । स्कुटर चालक हुन् काठमाण्डौ २६ बस्ने वर्ष ३३ को समिर राज महर्जन । उनलाई पोखरा ११ फूलबारीबाट प्र.३–०२–००७ प २०२९ नं. को स्कुटर सहित पक्राउ गरेको कास्की प्रहरीले जानकारी दिएको छ ।

कास्की जिल्ला अदालतबाट सवारी ज्यान सम्बन्धी कसूरमा ७ दिन म्याद थप गरी अनुसन्धान प्रकृया अगाडि बढाइएको कास्की प्रहरीले जनाएको छ ।

यद्यपी, स्कुटर चालक समिरले भने आफू अगाडि रहेको बोलेरोले ठक्कर दिएको बताएका छन् । समिरका परिवार गण्डकन्यूजको सम्पर्कमा आई प्रहरीले बोलेरो नखोजी पछाडि रहेको स्कुटरलाई दोषी बनाएर मुद्धा दर्ता गरेको आरोप लगाएको छ ।

• अद्यावधिक गरिएको ।