तनहुँमा फेरि चितुवाको आक्रमणमा परी एक बालकले ज्यान गुमाएका छन् ।

मृत्यु हुनेमा जिल्लाको बन्दिपुर गाउँपालिका वडा नं. २ कुवादी बस्ने दल बहादुर गुरुङको छोरा वर्ष ६ को उत्सव गुरुङ रहेको तनहुँ प्रहरीले जानकारी दिएको छ ।

सोमबार साँझ अन्दाजी साढे ७ बजेको समयमा आफ्नै घरको आँगनमा बसिरहेको अवस्थामा अचानक चितुवाले आक्रमण गर्दा बालक घाइते भएका थिए । घाइते बालकलाई उपचारको लागि बन्दिपुर अस्पतालमा लगेकोमा उपचारको क्रममा ८:२० बजेको समयमा डाक्टरले मृत घोषणा गरेको हो ।

गत २०८१ चैत २९ गते साँझ साढे ६ बजेतिर बन्दिपुर गाउँपालिका वडा नं. २ मै कामी डाँडाकी १० वर्षीया अनुजा बिकलाई चितुवाले आक्रमण गर्दा उनको ज्यान गएको थियो । अनुजा घरभन्दा डेढ किलोमिटर टाढा फुपु दिदी घर जाने भन्दै निस्किएकी थिइन् । बालिका निकै बेरसम्म घर नफर्किएपछि परिवारले खोजी गरेका थिए । काकाले बाटोमा अनुजाको चप्पल देखेपछि तुरून्त छिमेकी र प्रहरीलाई खबर गरेर खोजी सुरु गरिएको थियो ।

चितुवाले घरदेखि तल जंगलमा लगेर खाएको अवस्थामा शव भेटियो । घाँटी र दाहिने तिघ्राको भाग खाइसकेको अवस्थामा बालिका भेटिएकी थिइन् ।

चितुवाको आक्रमणबाट पछिल्लो अवधिमा १६ जना बालबालिकाले ज्यान गुमाइसकेका छन्। यसमध्ये २०७४ देखि २०७६ सम्म २ वर्षभित्र मात्रै ९ जना बालबालिकाले ज्यान गुमाएका थिए । चितुवाको आक्रमणबाट ज्यान गुमाउनेमा १२ वर्षभन्दा कम उमेरका बालबालिका छन्।

चितुवाको आक्रमणबाट भानु र शुक्लागण्डकी नगरपालिका सहित आँबुखैरेनी र बन्दीपुर गाउँपालिकामा बालबालिकाको मृत्यु भएको छ । मृग, वनकुखुरालगायत वन्यजन्तु मानिसले सिकार गरिदिँदा वनमा सिकार अभाव भई चितुवाले मानिसको सिकार गर्न थालेको डिभिजन वन कार्यालय तनहुँ बताउँछ।

चितुवाबाट जोगिन साँझ र रातका समयमा बालबालिका एक्लै नछाड्न सुझाव

चितुवाबाट जोगिन साँझ तथा रातको समयमा घरगोठ उज्यालो बनाउन, एक्लै नहिँड्न आग्रह गरिएको छ । चितुवासँग जोगिन साँझ तथा रातका समयमा घरगोठ उज्ज्यालो बनाउने, झाडी सफा गर्न तथा बच्चा तथा वृद्धको विशेष ख्याल र रेखदेख गर्नुपर्ने सुझाव छ ।

जङ्गल फडानी गरेर बस्ती बसाल्ने, जङ्गली जनावर मारेर खाइदिने कारणले गर्दा र मानव र वन्यजन्तुबीच द्वन्द्व बढ्दो अवस्थामा रहेको छ।

१६ जना बालबालिकाले चितुवाका कारण ज्यान गुमाइसक्दा र ५ भन्दा बढी बालबालिका घाइते हुँदा पनि जंगल घरछेउ हुनेहरूले बालबालिका एक्लै किन छाड्छन् ? सचेत किन हुँदैनन् ? सावधानी अपनाउन जरूरी छ । जंगल नजिक घर हुनेहरूले साँझ र एकान्तमा बालबालिका एक्लै छाड्नु हुँदैन ।

डिभिजन वन कार्यालय तनहुँका अनुसार चितुवाको आक्रमणबाट वि.सं. २०७४ फागुन १ गते भानु नगरपालिका ३ दोरदोरका ६ वर्षीय विशाल श्रेष्ठ, २०७५ कात्तिक २९ गते भानु नगरपालिका ४ जोखानेका ४ वर्षीया रन्जिता लम्साल, मंसिर १५ गते भानु नगरपालिका २ ढल्केवरका १० वर्षीय अमृत गुरुङ, २०७६ जेठ २४ गते भानु नगरपालिका २ भकुण्डथोक निवासी ९ वर्षीया पुष्पा अधिकारी, असोज २१ गते भानु नगरपालिका १ जामुनेगैह्राका ४ वर्षीय आशीष बानियाँ र भानु नगरपालिका २ फुस्रेटारमा ७ वर्षीय ऋतिक रोकाको मृत्यु भएको थियो ।

२०७६ पुस १४ गते शुक्लागण्डकी नगरपालिका ३ रातमाटाका २२ महिनाका बालक रविन नेपाली, पुस २० गते आँबुखैरेनी गाउँपालिका १ रानागाउँका ८ वर्षीय पुजन सिंजाली, माघ १३ गते बन्दीपुर गाउँपालिका ४ लोहीपाखाका १० वर्षीय इशक सुनार, विसं २०७७ साउन २२ गते शुक्लागण्डकी नगरपालिका २ का डेढ वर्षीय नारायण रानाको चितुवाको आक्रमण मृत्यु भएको थियो ।

२०७९ जेठ ३१ गते बन्दीपुर गाउँपालिका १ बोडीस्वाँराका पाँच वर्षीय सुपिम्र बगाले मगर, कात्तिक ४ गते बन्दीपुर गाउँपालिका ३ सिस्नेघारीमा ११ वर्षीय विना चेपाङ र कात्तिक १५ व्यास नगरपालिका १२ छिर्कनेमा ५ वर्षीय अरविन कुँवरको मृत्यु भएको छ ।

२०८१ साउन ३ गते राति बन्दीपुरमा चितुवाको आक्रमणबाट १३ वर्षीय बालक सुन्दर अछामीको मृत्यु भएको थियो ।