काठमाडौं । काठमाडौं प्रहरीले लागू औषधसहित दुईजना मानिस र भारतीय नम्बरको गाडी नियन्त्रणमा लिएको छ ।

पक्राउ पर्नेमा नुवाकोट पञ्चकन्या गाउँपालिका २ घर भई काठमाडौं महानगरपालिका १४ बल्खु बस्ने २६ वर्षीय राजु मिजार र २४ वर्षीया मीना मगर रहेका प्रहरीले जनाएको छ ।

शुक्रबार काठमाडौं महानगरपालिका १४ कुलेश्वर स्थित फलफूलबजार नजिकै शङ्कास्पद अवस्थामा रोकी राखेको UP७८CB९८३५ नम्बर प्लेट भएको भारतीय SANTRO कारलाई चेकजाँच गर्ने क्रममा गाडीको ढोकामा र डिक्कीमा खालि सिलिन्डर भित्र लुकाइ छिपाइ राखिएको अवस्थामा लागुऔषध फेला पारेको हो ।

प्रहरीले उनीहरुको साथबाट ट्रमाडोल ८२९० फायल गरी जम्मा ८२ हजार ९०० क्याप्सुल, विभिन्न कम्पनीको मोबाइल २ थान, अक्सिजन सिलिन्डर १ थान, UP७८CB९८३५नम्बर प्लेट भएको भारतीय SANTRO कार १ थान र नगद ६५ हजार रुपैयाँसमेत बरामद गरेको छ ।

प्रहरीका अनुसार पक्राउ परेका राजु मिजार विरुद्ध यसअघि पनि २ पटकसम्म लागु औषध कसुरमा मुद्दा चलेको अभिलेखबाट देखिएको छ ।

पक्राउ परेका उनीहरु विरुद्ध काठमाडौं जिल्ला अदालतबाट ११ दिनको म्याद थप अनुमति लिइ थप अनुसन्धान भइरहेको प्रहरीले जनाएको छ।