स्याङ्जाको फेदीखोला गाउँपालिकाले हल गोरु पाल्ने कृषकलाई प्रोत्साहन अनुदान रकम वितरण गरेको छ । पालिकाले चालू आर्थिक वर्ष २०८१/८२ को कृषक प्रोत्साहन कार्यक्रमअन्तर्गत हल गोरु पाल्ने कृषकहरुलाई ७५ प्रतिशत प्रोत्साहन अनुदान रकम वितरण गरेको हो ।

आधुनिक यन्त्रहरुको प्रयोग बढेपनि कृषकहरु घट्दै गइरहेको र खेतीयोग्य भूमि बाँझो छोड्ने प्रवृत्ति बढिरहेको कृषकमा नैराश्यता बढ्दै गइरहेको अवस्थामा जैविक विविधता वातावरणीय प्रभावमा पनि महत्वपूर्ण टेवा पुर्याउने गोरु पालन कृषकहरुलाई सम्मान स्वरूप अनुदान वितरण गरिएको गाउँपालिका अध्यक्ष घनश्याम सुवेदीले जानकारी दिए ।

“हामी सधैँ श्रमजीवी र किसानको पक्षमा दृढताका साथ उभिएका छौँ ।”, अध्यक्ष सुवेदीले भने, “पालिकाले परम्परागत कृषि प्रणालीको संरक्षण र कृषकलाई आर्थिक प्रोत्साहन दिने उद्देश्यले हल गोरु पाल्ने किसानलाई अनुदान वितरण कार्यक्रम सञ्चालन गरेको छ ।”

गाउँपालिका अध्यक्ष सुवेदीले गोरु पालक कृषकलाई सम्मान व्यक्त गर्नका लागि अनुदान वितरण गरिएको बताउँदै काम गर्ने कृषकको साथमा पालिका सरकार रहने भन्दै निराश नभई निरन्तर कर्ममा लाग्न आग्रहसमेत गरे । उनले स्थानीय सरकार कृषकको साथमा रहेको बताउँदै कृषकलाई प्रोत्साहन हुने गरी हरेक कार्यक्रम ल्याउने बताए ।

उनले स्थानीय सरकार कृषकको उत्पादन प्रक्रियादेखि बजारीकरणसम्म साथमा रहेको र उत्पादनमा आधारित अनुदान, बाँझो जमीन उपयोग प्रोत्साहन, न्यूनतम समर्थन मूल्य निर्धारण, कृषि एम्बुलेन्सजस्ता प्रत्यक्ष किसानले लाभ महसुस गर्ने कार्यक्रम निरन्तर रहिरहने बताए ।

अध्यक्ष सुवेदीले यस कार्यक्रममार्फत किसानको उत्पादन लागत घटेर आम्दानी बढ्ने, सामूहिक श्रम र परम्परागत कृषि अभ्यासको पुनर्जीवन हुने, यान्त्रिक जोतको सट्टा वातावरणमैत्री विधिको प्रोत्साहन हुने, हराउँदै गएको हल गोरु जोत्ने परम्पराको संरक्षण हुने अपेक्षा लिइएको बताए । उनले यो कार्यक्रमले किसानको मनोबल बढाउँदै दिगो, आत्मनिर्भर र सांस्कृतिकरूपमा समृद्ध कृषि प्रणालीतर्फ सकारात्मक संकेत दिएको समेत उल्लेख गरे ।

हलगोरु पाल्ने कृषकहरुलाई प्रोत्साहन अनुदान वितरण कार्यक्रमअन्तर्गत आ.व २०८०/८१ मा पालिकाका दुई सय २४ जना कृषकलाई एक हल गोरु बराबर १० दस हजार रुपैयाँका दरले दुई सय ८९ वटा हल गोरुको चौध लाख ४५ हजार रुपैयाँ अनुदान वितरण गरिएको पालिकाले जनाएको छ ।