पोखरा । विश्व संगीत दिवसलाई जोजिजू म्यूजिक सेन्टरले सांगीतिक एवं सांस्कृतिक कार्यक्रमसहित मनाएको छ । संस्थाले गीतारवादक अमीत गुरुङलाई सम्मानसमेत गर्‍यो ।

सेन्टरका प्रबन्ध निर्देशक बिनित जोजिजूले विगतमा पोखरास्थित विभिन्न संघसंस्था मिलेर संयुक्तरुपमा दिवस मनाउने प्रचलन रहेकोमा यसपालि सामूहिक कार्यक्रम नभए पनि आफूहरुले पहल गरेको बताए ।

पोखराको सिम्पानी निवासी गीतारवादक गुरुङ दुई दशकभन्दा बढी समयदेखि सांगीतिक क्षेत्रमा क्रियाशील छन् ।

प्रमुख अतिथि कवि एवं संस्कृतिकर्मी तीर्थ श्रेष्ठले उनलाई दोसल्ला, माला र सहित सम्मानपत्र प्रदान गरे । सो अवसरमा श्रेष्ठले पोखरामा विश्व संगीत दिवसमा विगतमा हुने गरेका कार्यक्रमको चर्चा गर्दै यसको महत्वमाथि प्रकाश पारे ।

उनले पोखरा महानगरपालिकाले विश्व संगीत दिवस अवसरमा पोखराको चिनारी फैलाउनेखालको सांगीतिक कार्यक्रम गर्न सुझाव दिए । त्यसका लागि यहाँको पुराना ब्याण्डहरुलाई एकै स्टेजमा उभ्याउन सकिने भन्दै कार्यक्रममा उपस्थित पोखरा–११ का वडाध्यक्ष प्रेमप्रसाद कर्माचार्यमार्फत महानगरमा यो योजना अघि सार्न अनुरोध पनि गरे ।

सो अवसरमा वडाध्यक्ष कर्मचार्य, पोखरा सांगीतिक कलाकार संघका पूर्व अध्यक्ष सुनिल थापा, पोखरा प्रज्ञा–प्रतिष्ठानका निवर्तमान कुलपति पद्मराज ढकाल लगायत बोलेका थिए । कार्यक्रम संचालन पोखरा सांगीतिक कलाकार संघका सचिव एमडि काफ्ले र कार्यक्रम संयोजक सानु जोजिजुले संयुक्तरुपमा गरेका थिए । कार्यक्रम संस्थाका प्रबन्ध निर्देशक बिनित जोजिजूको अध्यक्षतामा भएको हो ।

सो अवसरमा शास्त्रीय, भक्ति संगीत, सुगम, आधुनिक, लोकसंगीतका साथै सांगीतिक धून, लाइभ ब्याण्ड प्रस्तुत गरिएको थियो ।

यस्तै, विभिन्न नेवारी डान्स, लोक आधुनिक नृत्यसमेत प्रस्तुत हुँदा दर्शक रमाएका थिए ।