म्याग्दी । आयात घटाउने, स्थानीय कृषकलाई आत्मनिर्भर र व्यावसायिक बनाउने उद्देश्यले अन्नपूर्ण गाउँपालिका वडा नम्बर ७ हिस्तान टिकोटमा तरकारीको पकेट विकास कार्यक्रम सुरु भएको छ ।

प्रधानमन्त्री कृषि आधुनिकीकरण परियोजना अन्तर्गत गाउँपालिकाले टिकोटको हरिमूल कृषि तथा पशुपक्षी कृषक समूहमार्फत पकेट कार्यक्रम सञ्चालन गरेको हो ।

गाउँपालिकाका कृषि अधिकृत श्यामशरण कुर्मीले २० जना आबद्ध समूहमार्फत १ सय ४० रोपनीभन्दा बढी क्षेत्रफलमा व्यावसायिक तरकारी खेती भएको जानकारी दिए ।

‘समूहमा आबद्ध नभएका कृषकलाई पनि समेटेर बन्दा, काउली, काँक्रो, करेलालगायत तरकारी खेती भएको छ,’ उनले भने, ‘पकेट कार्यक्रममार्फत कृषकलाई अनुदानमा बीउ, कृषि औजार र प्रविधि सहयोग गरेका छौं ।’

गाउँपालिकाको ११ लाख ९९ हजार ३२२ र कृषकको ८ लाख ५४ हजार ८ सय ९८ गरी कुल २० लाख ५४ हजार २ सय २१ को लागतमा यस वर्ष विभिन्न कार्यक्रम भएको छ । कृषकले सिँचाइ सामग्रीमा ८५ प्रतिशत र अन्यमा ५० प्रतिशत अनुदान पाएका छन् ।

८ वटा प्लास्टिक घर निर्माण, ४ मिनिटेलर हलो, ५ तराजु, १ हजार लिटर क्षमताको १३ वटा सिँचाइ ड्रम, २ हजार ४ सय मिटर पाइप, २५ ५ लिटर क्षमताको हजारी, १६ लिटर क्षमताको १३ वटा स्प्रेयर, २ सय वटा क्रेट, ९ वटा थोपा सिँचाइ सेट, १ सय ४० थान स्पिंकल, ९८ किलोग्राम लुज पाइप र १ सय वटा सिड ट्रे वितरण गरिएको छ ।

१ लाख ३५ हजारको बीउ, १ लाखको सुष्म तत्व र जैविक मल, १ लाखको विषादी तथा ३० हजार बराबरको २ सय किलोग्राम पिटमस वितरण गर्नाका साथै ३ दिने तरकारी खेतीसम्बन्धी तालिम सञ्चालन भएको थियो । उच्च पहाडी भूगोलको चिसो हावापानीमा तरकारी खेती राम्रो हुने भएकाले पकेट क्षेत्र स्थापना गरिएको हरिमूल कृषि समूहका अध्यक्ष थमबहादुर पुर्जाले बताए ।

टिकोटका कृषकले उत्पादन गरेको तरकारी बेनी, जोमसोम, पोखरा, बागलुङ लगायतका ठाउँमा बिक्री हुने गर्छ । २ वर्षसम्म सञ्चालन हुने कार्यक्रमका लागि आगामी आर्थिक वर्षमा ६ लाख बजेट प्रस्ताव गरिएको अन्नपूर्ण गाउँपालिकाका उपाध्यक्ष दिवा तिलिजा पुनले बताए । रासस