पोखरा । गण्डकी प्रदेशका मुख्यमन्त्री सुरेन्द्रराज पाण्डेले प्रेस स्वतन्त्रताको नाममा पत्रकारितामा छाडापन हुन नहुनेमा जोड दिएका छन् । उनले यस्ता प्रवृत्ति देखिन थालेको भन्दै तथ्यमा आधारित प्रमाणसहितको पत्रकारिता हुनुपर्ने बताए ।

प्रदेशसभामा पत्रकारिता, सूचनाको हक र मिडिया नियमनसम्बन्धी विषयमा धारणा राख्दै मुख्यमन्त्री पाण्डेले भने, ‘स्वतन्त्रता भनेको छाडातन्त्र होइन । पत्रकारले लेख्ने हक छ, तर त्यो तथ्यमा आधारित हुनुपर्छ । मन लाग्यो भनेर लेखिने समाचारले व्यवस्थामाथि नै खतरा ल्याउन सक्छ ।’

पत्रकारिता गर्न सूचनाको हक प्रयोग गरेर प्रमाण खोज्न सकिने सुझाउँदै उनले ४ वर्षअघि बन्द अवस्थामा रहेको मिडिया काउन्सिलसम्बन्धी विधेयक आफूले अघि सारेको उल्लेख गरे । उनले पत्रकारिता नियमन राज्यको मात्र नभई सञ्चारकर्मीहरूको पनि साझा जिम्मेवारी भएको बताए ।

पाण्डेले पत्रकारहरूलाई तथ्य खोज्न र प्रमाणसहित समाचार प्रकाशन गर्न आग्रह गर्दै भने, ‘तपाईंहरू आउनुहोस्, कार्यालयमै आउनुहोस्, सूचनाको हक लिनुहोस् । त्यसपछि लेख्नुहोस् ।’

उनले भने, ‘हामीले ल्याएको यो लोकतन्त्र सजिलोसँग गुम्न सक्छ । पत्रकारहरू पहिलो शिकार हुन सक्नुहुन्छ । तपाईंहरूको कलम भाँचिएपछि मात्रै हाम्रो मुख थुनिन्छ ।’

मुख्यमन्त्री पाण्डेले सामाजिक सञ्जालमा व्यक्त हुने रिसइबी र अफवाहहरूले मेनस्ट्रीम मिडिया प्रभावित भइरहेको भन्दै चिन्ता व्यक्त गरे । ‘सामाजिक सञ्जालमा केही लेखियो, त्यसको भोलिपल्ट मिडियामा समाचार आउँछ । के सूचना हो र के होइन भन्ने छुट्याउनैपर्छ,’ उनले भने ।