पोखरा । भारतको दक्षिणी राज्य तेलङ्गानाको एक केमिकल्स कारखानामा भएको विस्फोट र आगलागीमा परी कम्तीमा ३६ जनाको मृत्यु भएको छ । करिब ३६ जना घाइते भएको अधिकारीहरूले बताएका छन् ।

सोमबार राज्यको राजधानी हैदराबादबाट करिब ५० किलोमिटर (३१ माइल) टाढाको औद्योगिक क्षेत्रमा उक्त दुर्घटना भएको हो ।

घटनामा अझै २४ जना हराइरहेका र उनीहरुको खोजी भइरहेको छ ।

घटनाको समयमा कारखानामा रहेका ५७ जना सुरक्षित रहेको समाचारमा जनाइएको छ । प्रधानमन्त्री नरेन्द्र मोदीले सामाजिक सञ्जाल एक्समार्फत दुर्घटनाप्रति दुःख व्यक्त गर्दै घटनाबाट अत्यन्त दुःखी भएको बताएका छन् ।

प्रधानमन्त्रीले ज्यान गुमाउनेका परिवारलाई प्रधानमन्त्री राहत कोषबाट प्रतिव्यक्ति दुई लाख रुपैयाँ र घाइतेहरूलाई ५०–५० हजार रुपैयाँ अनुग्रह सहायता उपलब्ध गराइने जानकारी पनि दिएका छन् ।

बिहार सरकारले पनि ज्यान गुमाउने बिहारका नागरिकलाई २–२ लाख रुपैयाँ र घाइतेहरूलाई ५०–५० हजार रुपैयाँ राहत स्वरूप उपलब्ध गराउने घोषणा गरेको छ ।