स्याङ्जा । रवि लामिछाने नेतृत्वको राष्ट्रिय स्वतन्त्र पार्टी (रास्वपा) स्याङ्जाका नेता प्रकाश अर्यालले कुटपीट गरेको भन्दै एक मजदुर प्रहरीकहाँ पुगेका छन् ।

पीडित भनिएका राजकुमार राईले उनीविरुद्ध वडा प्रहरी कार्यालय वालिङमा उजुरी दिएपछि सोमबारको घटना मंगलबार बाहिर आएको हो । त्यहाँका प्रहरीले घटनाबारे अनुसन्धानका लागि सम्बन्धित व्यक्ति नियन्त्रणमा लिइसकिएको जानकारी दिएको छ ।

घटना विवरणअनुसार मिस्त्री काम गर्ने उनी सोमबार साँझ काम सकेर कोठामा बसिरहेका थिए । त्यसैबेला अर्याल नेतृत्वको समूह अश्लिल गालीगलौज गर्दै आक्रमणमा उत्रिएको ती मजदूरको गुनासो छ । ‘यहाँ फेरि देखे भने मारिदिन्छु’ भन्दै धम्की समेत दिएको उजुरीमा उल्लेख गरिएको छ ।

‘प्रकाश अर्यालसहितका व्यक्तिहरुले कुनै कारण बिना नै अश्लिल शब्द प्रयोग गर्दै मलगायत मेरा साथीहरुलाई कुटपिट गरे’, उजुरीमा भनिएको छ, ‘कुटपिटबाट म र मेरा साथीहरु घाइते भएका छौँ ।’

कुटपिटमा संलग्नहरुलाई तत्काल पक्राउ गरेर कानुनी कारवाही गर्न उनले माग गरेका छन् । कुटाई खाएका राई पोखरा पुगेकाले बुधबार फर्कँदै गरेको र त्यसपछि घटनाबारे थाहा हुने पनि प्रहरी बताउँछ ।

सामाजिक सञ्जालमा सक्रिय स्याङ्जाका युवा एलपी ढकालले फेसबुक मार्फत् घटनाबारे सार्वजनिक गरेपछि पीडकलाई कानुनी कारबाहीमा ल्याउन दबाब परेको हो ।

अर्यालले ०८४ को निर्वाचनमा वालिङ नगरपालिकाको मेयर बन्ने भन्दै स्थानीय सरकारविरुद्ध अभियान चलाइरहेका छन् । उनले त्यहाँका मेयर, उपमेयर र अन्य जनप्रतिनिधिविरुद्ध पनि दुष्प्रचार गर्दै आएको बताइन्छ ।

उनको सामाजिक सञ्जाललाई अध्ययन गर्ने हो भने कारगारमा रहेका पार्टी सभापति रवि लामिछानेको पक्षमा विभिन्न सामाग्री प्रचारप्रसार गरेको देखिन्छ । सहकारी ठगी प्रकरणमा कारागार पुगेका लामिछानेलाई छुटाउन उनले हस्ताक्षर संकलन अभियान समेत चलाइरहेका छन् ।

थप विवरण अद्यावधिक गरिएकोः सं.

सिफारिस समाचारः

स्याङ्जामा रास्वपाका नेताहरूलाई काँग्रेसबाट निर्वाचित वडाध्यक्ष सुनिल खनालले रड हाने