पोखरा । राष्ट्रिय परीक्षा बोर्डले सार्वजनिक गरेको माध्यमिक शिक्षा परीक्षा (एसइई) २०८१ को नतिजा अनुसार यस वर्ष नौ सय ७१ जनाले सर्वोत्कृष्ट ४ जीपीए ल्याए । तीमध्ये पोखराकी एञ्जिला अर्याल सबैभन्दा कान्छी टपर हुन् ।

२०८१ को एसइई परीक्षा ७ चैतदेखि सञ्चालन भएको थियो । २०६७ साल फागुन १५ गते जन्मिएकी एञ्जिला एसएलसी दिने समयमा १४ वर्ष २२ दिनको मात्रै थिइन् ।

कास्कीको पोखरा स्थित शिशु निकेतनकी छात्रा एञ्जिलाले यो एसइईमा देशमै सबैभन्दा कम उमेरमा चार जिपीए ल्याउने छात्रा बनेको बाबु चण्डीप्रसाद अर्याल बताउँछन् । ‘आधिकारिक निकायमा बुझ्दा नानी नै सबैभन्दा कान्छी रहेको जानकारी प्राप्त भयो । सबैजनाको जन्म मिति भेरिफाई गर्दा समय लाग्यो’ अर्यालले भने ।

स्याङ्जाको वालिङ ११ स्थायी ठेगाना भई हाल पोखरा ८ नागढुंगा बस्ने एञ्जिला सानै उमेरदेखि तीक्ष्ण बुद्धिको रहेको परिवार बताउँछ । ‘सानैदेखि कक्षामा प्रथम भइन्, अनि २ कक्षा फड्काएर अध्ययन अघि बढायौँ ।’ आमा मैना अर्यालले भनिन् ।

शालिन स्वभावकी एञ्जिला कविता लेखन, स्वीमिङमा रुचि राख्छिन् । पोखराकै मदरल्याण्ड स्कुल, मासबारमा कक्षा ११ मा साइन्स विषयमा भर्ना भइसकेकी एन्जिला भविष्यमा मुटुको डाक्टर बन्न चाहन्छिन् ।

कलिलै उमेरमा सर्वोत्कृष्ट नतिजा हाँसिल हुँदा परिवारमा खुशी छाएको बुवाआमा बताउँछन् । एञ्जिलाका दाइ उत्सव पनि राम्रो अंकका साथ एसइई उत्तीर्ण भएका थिए । कक्षा १२ उत्तीर्णपश्चात् उत्सवले हालै भारतको निट युनिभर्सिटीमा पूर्ण छात्रवृत्तिमा नाम निकाल्न सफल भएका छन् ।

यस वर्ष ४ जीपीए प्राप्त नौ सय ७१ मध्ये संघीय राजधानी काठमाडौंका मात्रै पाँच सय ४० जना रहे । ललितपुरमा एक सय जना, रुपन्देहीमा ८७ जना, कास्कीमा ६५ जनाले, चितवनमा ३७ जना, मोरङमा १८, धनुषामा २०, कैलालीमा सात जनाले चार जीपीए ल्याउन सके । गत वर्ष देशभर एक सय ८६ जनाले मात्र ४ जीपीए ल्याएका थिए ।