भेटेरिनरी अस्पताल तथा पशु सेवा विज्ञ केन्द्र, स्याङ्जाले जिल्लाका दुग्ध उत्पादक सहकारी, समूह तथा कृषकहरूलाई विभिन्न शीर्षकमा झण्डै १ करोड ७० लाख रुपैयाँ बराबरको अनुदान वितरण गरेको छ ।

दूध उत्पादनलाई प्रोत्साहन गर्न भीरकोट दुग्ध उत्पादक सहकारी र आँधीखोला कृषि उद्यम सहकारीलाई एक लिटर दूधमा पाँच रुपैयाँका दरले क्रमशः छ लाख ६० हजार ६५० र तीन लाख ४८ हजार ६ सय रुपैयाँ अनुदान प्रदान गरिएको हो । कुल नौ लाख ९९ हजार २५० रुपैयाँ वितरण गरिएको विज्ञ केन्द्रका प्रमुख डा. रूपेश श्रेष्ठले जानकारी दिए ।

श्रेष्ठका अनुसार, तीनवटा प्रस्तावमध्ये दुईवटालाई छनोट गरी उत्पादनको आधारमा अनुदान वितरण गरिएको हो । सहकारीबाट दैनिक सङ्कलन हुने विवरणलाई आधार मानेर पारदर्शी ढंगले रकम छुट्याइएको बताइएको छ ।

सहकारीलाई उपकरण र संरचना निर्माणमा पनि सहयोग
भीरकोट सहकारीलाई ७५ प्रतिशत अनुदानमा मिल्क एनालाइजर (एक लाख एक हजार रुपैयाँ मूल्य बराबर) वितरण गरिएको छ ।

त्यस्तै, चापाकोट–९ को केलादी दुग्ध उत्पादक समूहलाई नयाँ गोठ निर्माण, भकारो सुधार, च्याफ कटर, राँगो खरिद, डेरी उपकरणलगायतका शीर्षकमा १६ लाख ३९ हजार ९५३ रुपैयाँ बराबरको सहयोग गरिएको हो ।

९५ लाखको कृषि ऋण पनि वितरण
सिद्धबाबा एग्रो फर्म एण्ड रिसर्च सेन्टर प्रालि, चापाकोट–९ ले ९५ लाख रुपैयाँको कृषि ऋण पाँच प्रतिशत ब्याजमा प्राप्त गरेको छ ।

बजेट कार्यान्वयन प्रभावकारी
विज्ञ केन्द्र स्याङ्जाले आर्थिक वर्ष २०८१/८२ मा उपलब्ध चार करोड ५४ लाख चालू तथा ७० लाख पूँजीगत बजेटमध्ये ८२.६३ प्रतिशत बजेट उपयोग गरेको छ, जसलाई केन्द्रले उत्पादनमुखी र परिणाममुखी खर्चको नमुना मानेको छ ।