पोखरा । विश्व सर्प दिवसको अवसरमा पोखरामा सर्प पहिचान, नियन्त्रण, उद्दार र सुरक्षण सम्बन्धी एक दिने तालिम सम्पन्न भएको छ । वन विज्ञान अध्ययन संस्थान पोखरामा अध्ययनरत विद्यार्थीहरूलाई लक्षित गरी सोसाईटी फर वाईल्ड लाईफ रिसर्च एण्ड कन्जरभेसन सोरेकले उक्त तालिम आयोजना गरेको थियो ।

तालिममा सर्प संरक्षण क्षेत्रमा क्रियाशील युवा अनुसन्धानकर्ता तथा उद्धारकर्ता साथै नेपाल स्नेक रेस्क्यु टिमका संस्थापक प्रविन पाण्डे प्रमुख स्रोत व्यक्तिका रूपमा रहेका थिए । पाण्डेसँगै अर्का अनुभवी उद्धारकर्ता आर्शन क्षेत्री पनि सहप्रशिक्षकको रूपमा उपस्थित थिए।

तालिममा ८५ जना फरेस्ट्रीका विद्यार्थीहरूको सहभागिता रहेको थियो । सहभागीहरूलाई नेपालमा पाइने विषालु र अविषालु सर्पहरूको वैज्ञानिक चिनारी, उद्धार प्रक्रियाको सावधानीपूर्ण अभ्यास तथा सुरक्षित ह्याण्डलिङ प्रविधिबारे व्यवहारिक पक्षबारे जानकारी गरिएको थियो ।

विद्यार्थीहरूमा सर्पप्रतिको भय र भ्रमलाई हटाउँदै वैज्ञानिक बुझाइ र संवेदनशील दृष्टिकोण विकास गर्ने उद्देशयले तालिम आयोजना गरिएको थियो ।

तालिममा सहभागिमध्ये उद्धार कार्यमा विशेष चासो राख्ने विद्यार्थीहरूको सम्पर्क विवरण संकलन गरिएको र निकट भविष्यमा उनीहरूलाई सर्प उद्धार कार्यमा प्रत्यक्ष संलग्न गराई थप व्यवहारिक ज्ञान प्रदान गरिने आयोजक संस्थाले जनाएको छ । नेपालमा सर्प संरक्षण र उद्धार सम्बन्धी चेतना अभाव भइरहँदा यस किसिमका तालिमले सर्पको महत्व बुझाउन, मानव सर्प द्वन्द्व न्यूनीकरण गर्न तथा सह जीवितामूलक सोच विकसित गर्न मद्धत पुग्ने अपेक्षा आयोजकको छ ।

दीपेन्द्र साउदको अध्यक्षतामा भएको तालिममा सुमन भट्टराई प्रमुख अतिथिका रुपमा उपस्थित थिए । कार्यक्रममा स्वतन्त्र विद्यार्थी युनियनका प्रतिनिधि गौरव खड्का, सदिक्षा आचार्य, आदित्य रसाइली र सबिन सुनारको उपस्थिति रहेको थियो ।