जिल्ला ट्राफिक प्रहरी कार्यालय स्याङ्जाले आर्थिक वर्ष २०८१/०८२ मा ऐतिहासिक सफलता हासिल गरेको छ । एक वर्षको अवधिमा १ करोड ४१ लाख ५३ हजार ५ सय रुपैयाँ राजस्व संकलन गर्दै अहिलेसम्मकै उच्च आम्दानी गरेको कार्यालयले जनाएको छ ।

गत आर्थिक वर्ष २०८०/८१ मा १ करोड १० लाख ९७ हजार रुपैयाँ राजस्व संकलन भएकोमा यस वर्ष करिब ३० लाखले वृद्धि भएको हो । कार्यालय प्रमुख प्रहरी नायब निरीक्षक भूपेन्द्र प्रसाद गौलीका अनुसार पछिल्ला तीन वर्षदेखि राजस्व सङ्कलन दर वृद्धि हुँदै आएको छ ।

उक्त अवधिमा ट्राफिक प्रहरीले १९ हजार २८९ सवारीसाधन र चालकहरूलाई नियम उल्लङ्घन गरेको भन्दै कारबाही गरेको छ ।

सबैभन्दा बढी ६ हजार ७९३ मोटरसाइकल र सबैभन्दा कम १ हजार ४१५ ट्याक्टरलाई कारबाही गरिएको हो । त्यस्तै, २ हजार १९५ ट्रक, २ हजार ५१४ बस, ४ हजार ७५ जीप/कार/भ्यान, र २ हजार २९७ अन्य सवारीसाधनसमेत कारबाहीको दायरामा परेका छन् ।

कार्यालयका अनुसार मादक पदार्थ सेवन (मापसे) गरेर सवारी चलाउने १ हजार ४२५ चालकलाई कारबाही गरिएको छ । साथै, लागूपदार्थ सेवन (लापसे) गरी सवारी सञ्चालन गर्ने १३ जनालाई समेत आवश्यक कारबाही गरिएको छ ।

ट्राफिक कार्यालयका अनुसार आव २०८१/८२ मा स्याङ्जा जिल्लामा १८ वटा सवारी दुर्घटना भएका छन् । ती दुर्घटनामा ९ जनाको मृत्यु, १५ जना गम्भीर घाइते र ५ जना सामान्य घाइते भएका छन् ।

दुर्घटना न्यूनीकरणका लागि ट्राफिक प्रहरीले ४ हजार ४८५ पटक सचेतनामूलक कार्यक्रम सञ्चालन गरेको छ । उक्त अभियानमार्फत १ लाख १० हजार ३२० जनालाई ट्राफिक नियमसम्बन्धी जानकारी दिइएको कार्यालयले जनाएको छ ।

स्याङ्जा जिल्लाको करिब ९० किलोमिटर भाग सिद्धार्थ राजमार्गमा पर्ने भए पनि घुम्ती र पुराना सडक संरचनाका कारण नियमित चेकजाँचमा कठिनाइ हुने प्रहरी नायब निरीक्षक गौलीले बताएका छन् । यद्यपि, नियम कडाइ र सचेतनाले दुर्घटना न्यूनीकरणमा सघाउ पुगेको उनको विश्वास छ ।

सवारीसाधनको वृद्धि, अनुशासनहीनता र लापरवाहीका बाबजुद ट्राफिक कार्यालयले गरेको सक्रियता प्रशंसनीय छ । यस्ता पहलले दुर्घटनाको दर घटाउने मात्र होइन, नागरिकमा जिम्मेवारी बोध पनि गराउनेछ ।