पोखरा । नेकपा एमालेनिकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) गण्डकी प्रदेश कमिटी संयोजकको जिम्मेवारी सुरज सापकोटाले पाएका छन् ।

अध्यक्ष प्रबिन श्रेष्ठले आइतबार हालका सचिव सापकोटालाई संयोजकको जिम्मेवारी दिएका हुन् । सापकोटा नवलपरासी (बर्दघाट सुस्ता पूर्व)का हुन् ।

अनेरास्ववियु केन्द्रीय कमिटीको गत असार ६ को सर्कुलरले आफूलाई ३२ वर्षे उमेर हदबन्दी लागेपछि श्रेष्ठ अध्यक्षबाट बिदा भएका हुन् ।

सर्कुलरको बुँदा नं. १६ मा क्याम्पस कमिटी गठन र पुनर्गठनमा २८ वर्ष, जिल्ला र प्रदेश कमिटीमा ३२ वर्षभन्दा मुनि हुनुपर्ने मापदण्ड तोकिएको छ । सर्कुलर प्राप्त भएको एक महिनाभित्र जिम्मेवारी हस्तान्तरण गर्नुपर्ने भनिएको छ ।

गोरखाका श्रेष्ठ २०८० पुसमा पोखरामा भएको प्रथम अधिवेशनबाट अध्यक्ष निर्वाचित भएका थिए ।

आउँदो दसैं आसपास अनेरास्ववियु गण्डकीले नयाँ नेतृत्व पाउनेछ । अध्यक्षमा हालका उपाध्यक्षहरू विश्वदर्शन पराजुली, सुशन घिमिरे र सहसचिव स्वीकार पोखरेलको चर्चा छ । पराजुली र पोखरेल स्याङ्जाका हुन् भने घिमिरे कस्केली हुन् ।