पोखरामा डेंगुको जोखिम बढेपछि पोखरा महानगरपालिका वडा कार्यालय १२ र नेपाल रेडक्रस सोसाइटी वडा १२ उपशाखाको संयुक्त आयोजनामा बुधबार डेंगु सचेतना र्‍याली निकालिएको छ ।

जसको उद्देश्य समुदायमा डेंगु रोगको जोखिम, रोकथाम र नियन्त्रणका उपायहरूबारे जनचेतना फैलाउनु रहेको वडाध्यक्ष सन्तोष बास्तोलाले बताए ।

वडा कार्यालयबाट सुरु भएको र्‍याली विभिन्न टोल घुम्दै पुनः वडा कार्यालयमै पुगेर समापन भएको हो । जसमा ब्यानर र सचेतनामूलक सन्देशहरू सहित सहभागीहरूले लामखुट्टे नियन्त्रण र सरसफाइको महत्वबारे स्थानीयलाई जानकारी दिएका थिए ।

वडाध्यक्ष बास्तोलाले भने, “डेंगु नियन्त्रणको मूल उपाय भनेकै सचेतना हो । प्रत्येक नागरिकले आफ्नो घर वरपर सफा राख्ने बानी बसाल्नुपर्छ ।” उनले यस्ता कार्यक्रमले समाजमा सकारात्मक परिवर्तन ल्याउने विश्वास पनि व्यक्त गरे ।

नेपाल रेडक्रस सोसाइटी जिल्ला शाखा कास्की कोषाध्यक्ष एवं १२ उपशाखाका समन्यकर्ता मोहनसिंह खड्काले सामूहिक सहभागिताको आवश्यकता औँल्याउँदै भने, “सामूहिक प्रयासबिना डेंगु नियन्त्रण सम्भव छैन । हामी सबै मिलेर सचेत र सफा समुदाय निर्माण गर्नुपर्छ ।”

रेडक्रस सोसाइटी वडा १२ उपशाखा सभापति इन्दिरा पन्तले स्थानीयस्तरबाटै शुरु गरिएको यस्तो अभियानले दीर्घकालीन रूपमा सकारात्मक प्रभाव पार्ने विश्वास व्यक्त गरिन् ।

कार्यक्रममा वडाका जनप्रतिनिधि एवं कर्मचारी, स्थानीय आमा समूह, युवा क्लब, टोल विकास संस्था, स्वास्थ्य स्वयंसेविका, नेपाल रेडक्रस सोसाइटीका पधादिकारी, सामुदायिक सेवा केन्द्र–१२ र समाजसेवीहरूको उल्लेख्य सहभागिता थियो ।

कास्कीमा हाल करिब २ सय जना डेंगुका बिरामी रहेको सरकारी तथ्यांक छ । तीमध्ये ९५ प्रतिशत पोखराकै हुन् । गत वर्ष कास्कीमा ८ जना डेंगुका बिरामीको मृत्यु भएको थियो ।