स्याङ्जाको पुतलीबजार नगरपालिका वडा नं. ७ ठुलाडिही स्थायी घर भई हाल पोखरा महानगरपालिका –२६ मा बसोबास गर्दै आएका ४४ वर्षीय सुरेन्द्र रेग्मी आफ्नै बारीमा सुन्तलाको विरुवा रोप्ने क्रममा बन्दुकको छर्रा लागेर घाइते भएका छन् ।

गत साउन ६ गते रेग्मी बारीमा खाल्टो खन्दै गर्दा अचानक बन्दुक पड्किएको आवाज आएको र शरीरमा छर्रा लागेको भन्दै उनले आफन्तलाई जानकारी गराएका थिए । घटनाको अनुसन्धान गर्दा सोही ठाउँका ६९ वर्षीय हुम बहादुर शाही (ठकुरी भेना)को संलग्नता रहेको भन्दै घाइतेका आफन्तले प्रहरीमा जाहेरी दिएका थिए ।

जाहेरीको आधारमा जिल्ला प्रहरी कार्यालय स्याङ्जाबाट खटिएको विशेष टोलीले साउन ८ गते राति ८:१० बजे शाहीलाई तनहुँमा लुकीछिपी बसेको अवस्थामा पक्राउ गरेको हो । पक्राउपछिको अनुसन्धानमा शाहीले हतियार लुकाएको स्थान देखाइ दिएपछि पुतलीबजार –७ ठुलाडिहीबाट १ नाले भरुवा बन्दुक समेत बरामद गरिएको प्रहरीले जनाएको छ ।

शाहीमाथि ज्यान मार्ने उद्योगअन्तर्गत म्याद थप गरी स्याङ्जा जिल्ला अदालतबाट १० दिनको म्याद लिइ थप अनुसन्धान भइरहेको प्रहरी नायव उपरीक्षक तथा सूचना अधिकारी प्रसन्न राज चौधरीले जानकारी दिए ।

हाल घाइते सुरेन्द्र रेग्मीको काठमाडौँस्थित पाटन अस्पतालमा उपचार भइरहेको छ ।