सार्वजनिक अपराध मुद्दामा स्याङ्जा जिल्ला अदालतबाट दोषी ठहर भई रु. १,५२५ जरिवाना तोकिएर ९ वर्षदेखि फरार रहेका एक अभियुक्तलाई प्रहरीले पक्राउ गरी अदालतमा उपस्थित गराएको छ ।

अदालतको फैसला कार्यान्वयनमा चुस्तता, न्यायिक कारबाहीको पूर्णता र सुरक्षित तथा न्यायपूर्ण समाज निर्माण सुनिश्चित गर्ने उद्देश्यका साथ जिल्ला प्रहरी कार्यालय स्याङ्जाबाट खटिएको विशेष अपरेसन टोलीले प्रतिवादीलाई साउन २३ गते पक्राउ गरेको हो ।

पक्राउ पर्नेमा स्याङ्जा पुतलीबजार नगरपालिका –७ निवासी २९ वर्षीय सुवास गुरुङ रहेका छन् । उनलाई अदालतबाट २०७३ मंसिर १३ गते सार्वजनिक अपराध मुद्दामा रु. १,५२५ जरिवाना तोकिएको थियो । फैसला सुनाइएपछि फरार रहेका गुरुङलाई प्रहरीले स्याङ्जा जिल्लामै नियन्त्रणमा लिई जरिवाना असुलीका लागि सिधै स्याङ्जा जिल्ला अदालतमा पेश गरेको हो ।

जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्न राज चौधरीका अनुसार अदालतका फैसलाहरूको कार्यान्वयनमा सक्रियता बढाउँदै न्यायिक जिम्मेवारी निर्वाह गरिँदै आएको छ । फरार अभियुक्तको पक्राउले अदालतको आदेशको प्रभावकारिता र कानूनी शासनप्रति विश्वास अभिवृद्धि गर्ने अपेक्षा समेत गरिएको छ ।