पोखरा । अविरल वर्षाका कारण बेनी-जोमसोम सडक खण्डका विभिन्न स्थानमा खसेको पहिरोका कारण बिहीबारदेखि यातायात सेवा रोकिएको छ ।

मुस्ताङलाई राष्ट्रिय राजमार्गसँग जोड्ने एक मात्र मार्ग अवरुद्ध हुँदा मुक्तिनाथ तथा दामोदर कुण्ड दर्शनका लागि जाने यात्रुहरुलाई समस्या भएको छ ।

बेनी-जोमसोम सडक खण्डको रघुगंगा गाउँपालिका-३ बैसरीमा सडक माथिबाट झरेको पहिरोले गर्दा ५० मिटर जति सडक अवरुद्ध भएको छ । त्यस्तै, अन्नपूर्ण गाउँपालिका-३ को सुकेबगरमा पनि पहिरो खसेर सडक अवरुद्ध भएको जिल्ला प्रहरी कार्यालय, म्याग्दीका सूचना अधिकारी सागर पौडेलले जानकारी दिए ।

सडक खुलाउने प्रयास गरिएको भए पनि लगातारको वर्षाले गर्दा असहज भएको बेनी-जोमसोम-कोरला सडक आयोजनाका इन्द्रसिंह शेरचनले जानकारी दिए । अन्नपूर्ण गाउँपालिका-३ दानका पर्यटन व्यवसायी समेत रहेका शेरचनले भने, ‘पानी परिरहेको अवस्थामा कुनै पनि समय सडक अवरुद्ध हुन सक्छ, यात्रा गर्नुपूर्व सडकको अवस्था बुझेर मात्र यात्रा गर्नु उचित हुनेछ ।’

बेनी-दरवाङ सडक खण्डको बेनी नगरपालिका-४ धुमाउने भीर र मालिका गाउँपालिका-६ बांगे पहिरोमा अति जोखिम अवस्था रहेको समेत प्रहरीले जनाएको छ ।