पोखरा महानगरपालिका वडा नं. १४ कार्यालयले वडाबासी महिलाहरुलाई लक्षित गरी तीज विशेष कार्यक्रम मनाएको छ ।

वडा कार्यालय परिसरमा गरिएको तीजे दर खाने कार्यक्रममा वडाका २ हजार जति महिला दिदीबहिनी सहभागी भएको वडा अध्यक्ष बोधबहादुर कार्कीले जानकारी दिए ।

वडामा ५५ वटा महिला तथा आमा समूह रहेको र प्रायः सबैको सहभागिता रहेको कार्कीले जनाए । तीज विशेष कार्यक्रममा वडा नं. १४ निवासी गण्डकी प्रदेशसभा सदस्यद्वय सरस्वती गुरुङ र नन्दकला नेपालीको प्रमुख आतिथ्यता रहेको थियो ।

प्रदेशसभा सदस्य गुरुङले अब महिला देश हाँक्न सक्षम भइसकेको बताउँदै महिला सशक्तीकरणका लागि महिलाहरु सबै एक ठाउँमा उभिनुपर्नेमा जोड दिइन् । महिलाको मुद्धामा सबै लाग्नुपर्ने उनको भनाई थियो ।

प्रदेशसभा सदस्य नेपालीले तीज तडकभडक रहित तरिकाले मनाउनुपर्ने बताउँदै महिलाहरुले हक अधिकारका लागि यसलाई आवाज उठाउने आधार बनाउनुपर्ने बताइन् । समाजका हरेक कार्यक्रममा महिलाको उल्लेख्य सहभागिता रहेको उनको भनाई छ ।

नारी कल्याण आमा समूह अध्यक्ष सिर्जना पोखरेलले वडाले सम्झिएर सबैलाई एक ठाउँमा भेला हुने वातावरण तयार गरेकोमा धन्यवाद व्यक्त गरिन् । कार्यक्रममा प्रमुख अतिथिद्वयलाई दोसल्ला ओढाएर सम्मानसहित नारी कल्याण आमा समूहले उत्कृष्टता हाँसिल गरेकोमा सम्मान पनि गरिएको थियो ।

वडा अध्यक्ष बोध बहादुर कार्कीको अध्यक्षतामा भएको कार्यक्रममा स्वागत वडा सदस्य दिलमाया गुरूङ र सञ्चालन वडा सदस्य कृष्णहरि काफ्लेले गरेका थिए ।