स्याङ्जामा प्रहरीले अवैध रूपमा नदीजन्य पदार्थ ओसारपसार गरेका दुईवटा ट्याक्टरलाई नियन्त्रणमा लिएको छ ।

मंगलबार बिहान करिब ११:३० बजे प्रहरी चौकी दहथुमबाट खटिएको प्रहरी टोलीले भीरकोट नगरपालिका –२, ठाडोलाइन क्षेत्रमा सवारीसाधन चेकजाँच गर्ने क्रममा ग १ त ७४०९ नम्बरको ट्याक्टरले स्टक प्रमाणित नभएको बालुवा ओसारपसार गरेको फेला पारेपछि नियन्त्रणमा लिएको हो । नियन्त्रणमा लिइएको ट्याक्टरलाई आवश्यक अनुसन्धान तथा कारबाहीका लागि भीरकोट नगरपालिकाको कार्यालयमा पठाइएको प्रहरीले जनाएको छ ।

यसैगरी, अवैध रूपमा नदीजन्य पदार्थ ओसारपसार गरिरहेको भन्ने विशेष सूचनाका आधारमा वालिङ नगरपालिका –९, नाकेडाँडामा वडा प्रहरी कार्यालय वालिङबाट खटिएको विशेष टोलीले ग १ त ५७६९ नम्बरको ट्याक्टरलाई बालुवा लोड गर्दै गरेको अवस्थामा फेला पारेको थियो । उक्त ट्याक्टरसमेत नियन्त्रणमा लिइ अनुसन्धान तथा कारबाहीका लागि वालिङ नगरपालिकाको कार्यालयमा बुझाइएको प्रहरीले जनाएको छ ।

उक्त घटनाबारे जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्न राज चौधरीले दुवै ट्याक्टरलाई कानूनी प्रक्रिया अनुसार कारबाही अघि बढाइने बताए ।