पोखरा यातायात प्रालिको सातौं वार्षिक साधारणसभा बिहीबार सम्पन्न भएको छ । कार्यक्रम उद्घाटन गर्दै नेपाल यातायात व्यवसायी राष्ट्रिय महासंघ गण्डकीका संयोजक केदार पौडेलले पोखरा यातायातले दूरदराजमा सेवा दिइरहेको बताए ।

पोखरा १६ का वडाध्यक्षसमेत रहेका कम्पनीका सल्लाहकार अमृत शर्मा तिमिल्सिनाले पोखरामा २ सयदेखि साढे २ सय यात्रुवाहक बस पर्याप्त हुने भए पनि ८ सयभन्दा बढी बस सञ्चालित रहेको बताए । उनका अनुसार केही निकायको सहकार्यमा पोखराको यातायात व्यवस्थापन सुव्यवस्थित गर्ने तयारी भइरहेको छ ।

पृथ्वी राजमार्ग बस सञ्चालक कम्पनी अध्यक्ष योगेन्द्रबहादुर केसीले यातायात क्षेत्रलाई सरकारले प्राथमिकतामा नपार्दा व्यवसायीहरु समस्या परेको गुनासो गरे । उनले यातायात व्यवसायीको पेशागत सुरक्षामा तत्काल ध्यान दिनुपर्ने आवश्यकता औंल्याए ।

कार्यक्रममा सल्लाहकार वसन्त प्रधान र बमबहादुर गुरुङ, नेपाल यातायात व्यवसायी राष्ट्रिय महासंघ जिल्ला समन्वय समिति कास्की संयोजक कृष्ण पौडेल, नेपाल यातायात स्वतन्त्र मजदूर संगठन गण्डकी अध्यक्ष देवीराज थिङलगायतले व्यवसायीलाई यात्रुमैत्री सेवा प्रदान गर्नुपर्ने बताए ।