पोखरा । कास्की कारागारबाट जेन-जी आन्दोलनका क्रममा भागेका कैदीबन्दीमध्ये २ सय ७० जना अझै फरार छन् । भदौ २४ गते भागेर फरारमध्ये अधिकांश गम्भिर अपराधमा दोषी ठहर भएर कैद भुक्तान गरिरहेका छन् ।

कास्की कारागारमा ७ सय ७३ कैदीबन्दी थिए । तीमध्ये महिला ब्लकमा ३५ र पुरुष ब्लकमा ७ सय ३८ जना रहेका थिए । भागेकामध्ये केही स्वेच्छाले फर्किएका छन् भने केहीलाई प्रहरीले पक्राउ गरेर बुझाएको छ । कारागार प्रमुख राजेन्द्र शर्माका अनुसार ५ सय २१ जना कैदीबन्दी फिर्ता भैसकेका छन् ।बाँकी कैदीबन्दीको खोजी जारी छ ।

फरार रहनेहरुको अब प्रहरीमार्फत खोजी गर्न लागिएको छ । फरार कैदीबन्दीहरूमध्ये अधिकांश जबर्जस्ती करणी, लागुऔषध कारोबार, कर्तव्य ज्यान, चोरी, बैंकिङ कसुर, सवारी दुर्घटनामा ज्यान जाने, सहकारीसम्बन्धी मुद्दा, बालयौन दुराचार, अभद्र व्यवहार र कीर्ते मुद्दामा सजाय काटिरहेका थिए । कारागार कार्यालयले फरारको नामावली सार्वजनिक गरिसकेको र उनीहरूलाई पक्राउ गर्न प्रहरीको विशेष टोली गठन गरिएको छ ।

कारागार कार्यालयले सार्वजनिक गरेको सूचीअनुसार सबैभन्दा धेरै जबर्जस्ती करणी र लागुऔषध तथा चोरी र कर्तव्य ज्यानका कैदीबन्दी फरार भएका छन् । जबर्जस्ती करणीका ८३ जना, हाडनाता करणीका ८ जना फरार छन् । यस्तै, लागुऔषधतर्फका ५१ जना, चोरीका २१ जना, कर्तव्य ज्यानका ९ जना फरार छन् । ज्यान कसुरका छुट्टै ३ जना छन् भने आपराधिक लाभका १ जना र अपहरण तथा शरीर बन्धक गर्ने २ जना पनि अहिले कारागारको सम्पर्कमा छैनन् ।

अभद्र व्यवहार गर्ने ४ जना, सहकारी ठगीका ११ जना, सुनका १ जना, सवारी ज्यानका ५ जना, बैंकिङ कसुरका ६ जना, बहुविवाहका १ जना, चेक अनादरका ५ जना, अप्राकृतिक मैथुनका १ जना, लेनदेनका १ जना, बालबालिकासम्बन्धी कसुरका ३ जना, राष्ट्र बैंक ऐन कसुरका १ जना र कारागार ऐनका १ जना फरार छन् । फरारमध्ये १३ जना विदेशी छन् । अधिकांश लागुऔषध, जबर्जस्ती करणी र मानव बेचविखन मुद्दामा कैद भुक्तान गरिरहेका थिए । ११ जना भारतीय र २ जना चिनियाँ नागरिक समेत कास्की कारागारमा थिए ।

यसैबीच, जेनजी आन्दोलनका क्रममा पोखराको ग्यारजातीस्थित बाल सुधारगृहबाट भागेका १ सय ९ जना बालकहरूमध्ये हालसम्म ९६ जना फर्किएका छन् भने १३ जना अझै फर्किन बाँकी छन् ।

सुधारगृहबाट भागेका ती अधिकांश बालक जबर्जस्ती करणीसम्बन्धी मुद्दामा सुधारगृह पठाइएका थिए ।

फरार भएकाहरुबारे सम्बन्धित स्थानीय तह, प्रहरी चौकी र सर्वसाधारणलाई पनि सूचना दिइएको र सम्पर्कमा नआएकालाई कानूनी प्रक्रियाअनुसार पक्राउ गरी कारागारमा ल्याउने शर्माले सुनाए ।