स्याङ्जा जिल्लामा राति ९ बजेपछि तिहार पर्वको देउसी–भैलो खेल्न नपाइने भएको छ । जिल्ला प्रशासन कार्यालय स्याङ्जाले एक विज्ञप्ती जारी गर्दै राति ९ बजेपछि देउसी-भैलो खेल्न रोक लगाएको हो ।

शान्ति–सुरक्षा कायम राख्दै मर्यादित र अनुशासित रूपमा पर्व मनाउन प्रशासनले नौ बुँदे सचेतना अपिल सार्वजनिक गरेको छ ।

सूचना अधिकारी तथा सहायक प्रमुख जिल्ला अधिकारी दीपक पौडेलका अनुसार देउसी, भैलो, नाचगान लगायतका सांस्कृतिक क्रियाकलाप धर्म, संस्कृतिलाई ठेस नपुग्ने गरी मर्यादित रूपमा राति ९ बजेसम्म मात्रै सञ्चालन गर्न अनुरोध गरिएको छ । सार्वजनिक यातायातमा असर पर्ने, होहल्ला र अशान्ति सृजना गर्ने गतिविधि तत्काल रोकिने पौडेलले चेतावनी दिए ।

दीपावलीको समयमा विद्युत् र मैनबत्तीजस्ता सामग्रीको प्रयोगमा सावधानी अपनाउन, सम्भावित आगलागीमा तुरुन्त सुरक्षा निकायलाई खबर गर्न, मादक पदार्थ सेवन गरेर होहल्ला वा झगडा नगर्न पनि आग्रह गरिएको छ ।

साथै, सवारीसाधनको छतमा झुण्डिएर यात्रा नगर्न, यात्रुबाट बढी भाडा असुल्नेलाई कारबाही गरिने चेतावनी दिइएको छ । दीपावली मनाउने क्रममा भुईँचम्पा, पटाका, आतसबाजीजस्ता विस्फोटक पदार्थको प्रयोग, अवैध आयात वा बिक्री वितरण गर्नेलाई पनि कडा कानूनी कारबाही गरिने प्रशासनले स्पष्ट पारेको छ ।

विज्ञप्तिमा अखाद्यवस्तु, रङ मिसाइएका मिठाइ, म्याद गुज्रेका मसला तथा प्लास्टिकका फूलमाला प्रयोग र बिक्री वितरण नगर्न समेत अनुरोध गरिएको छ ।

त्यस्तै, जुवाजन्य खेल, कृत्रिम अभाव सिर्जना वा अन्य अवैध गतिविधि भएको खण्डमा तत्काल नियन्त्रणका लागि प्रहरी कन्ट्रोल नम्बर १०० मा सम्पर्क गर्न आग्रह गर्दै, प्रशासनले सचेत र जिम्मेवार नागरिकको रूपमा पर्व मनाउन सबैलाई आह्वान गरेको छ ।