३८ वर्षअघिको चोरी मुद्दामा फरार रहेका एक वृद्ध पक्राउ परेका छन् । विसं २०३५ साल वैशाख १५ गते साविक पेलाकोट गाउँपञ्चायत -२ हाल गल्याङ नगरपालिका -७ कल्लेरीका दिलबहादुर रानाको घरबाट २१ वर्षको उमेरमा सुनका गहना र रेडियो चोरी प्रकरणमा संलग्न गिरिप्रसाद गुरुङ ६८ वर्षको उमेरमा पक्राउ परेका हुन् ।

उक्त चोरी प्रकरणमा अदालतले २०४५ असोज १६ गते उनलाई नकबजनी चोरी आरोपमा १ महिना १५ दिन कैद र ४ हजार ५०० रुपैयाँ जरिवाना तोकिएको थियो । तर फैसला भएपछि उनी फरार रहेका थिए ।

तीन दशकभन्दा बढी समय फरार रहेका साविक सिर्सेकोट गाविस -२ हाल वालिङ् नगरपालिका –१२ घुरुङ्खाका ६८ वर्षीय गुरूङलाई परिवारसँग लुकेर बसिरहेको अवस्थामा वडा प्रहरी कार्यालय वालिङबाट खटिएको विशेष टोलीले कार्तिक २० गते पक्राउ गरेको सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए ।

यसअघि, सोही मुद्दामा संलग्न ६८ वर्षीय लालबहादुर राना कार्तिक १७ गते पक्राउ परिसकेका थिए । रानालाई १७ गते र गुरुङलाई २० गते अदालतमा पेश गरी स्याङ्जा कारागार पठाइएको डिएसपी चौधरीले बताए ।

प्रहरीका अनुसार वर्षौँसम्म फरार रहेका व्यक्तिहरूलाई कानूनी दायरामा ल्याउने अभियान निरन्तर जारी रहनेछ ।