पोखरा महानगरपालिका वडा नं. १३, आर्वामा विहीबारदेखि एन्ड्युरो अन्तर्राष्ट्रिय माउन्टेन बाइक रेस प्रतियोगिता हुँदैछ ।

डाउन टिल डस्क प्रालिको आयोजनामा यही कात्तिक २७ देखि २९ गतेसम्म आर्वाको महाप्रभु धाममा चल्ने तेस्रो संस्करणको प्रतियोगितामा साइक्लिङको डाउनहिल एक दशमलव ६ किलोमिटरको दूरीमा नेपाल सहित विभिन्न १३ देशका साईक्लिस्टले प्रतिस्पर्धा गर्ने वडाध्यक्ष किरण बरालले जानकारी दिए ।

नेपालसहित, अस्ट्रेलिया, सिंगापुर, क्यानडा, जर्मन, अमेरिका, ओमान, जापान, श्रीलंका सहितका साईक्लिष्टहरुको सहभागिता हुने पक्का भएको छ । प्रतियोगितामा ६० साईक्लिस्टले भाग लिने छन् भने ६ इभेन्टमा प्रतिस्पर्धा गराईने प्रालिका प्रवन्ध निर्देशक एवं रेस निर्देशक सुनीलचन्द्र शर्माले बताए ।

जुनियर १२ देखि १८ वर्षसम्म, पुरुष एलिट १९ वर्षमाथि खुला महिला १९ वर्षदेखि माथि, मास्टर ए पुरुष ३० देखि ३९ वर्षसम्म मास्टर बी पुरुष ४० देखि ४९ वर्षसम्म र भेट्रान्स पुरुष ५० वर्षमाथिको उमेर समूहमा प्रतिस्पर्धा हुने प्रालिले जनाएको छ ।

३० वर्षदेखि साइक्लिङ क्षेत्रमा काम गर्दै आएका रेस निर्देशक शर्माले आर्वासहित मणिदिप क्षेत्रलाई साइक्लिङको गन्तव्य बनाउन विगत ३ वर्षदेखि प्रतिस्पर्धा आयोजना गर्दै आएको बताए । विभिन्न ६ साइक्लिङ रेसका लागि ट्रेल बनाइएको छ । प्रतिस्पर्धामा उत्कृष्ट पाँच प्रत्येक इभेन्टकालाई साईक्लिङ एसोसिरिज पुरस्कार स्वरुप प्रदान गरिनेछ । उत्कृष्ट जम्प गर्ने साईक्लिस्टले ३० हजार बराबरको पुरस्कार प्रदान गरिने प्रालिले जनाएको छ ।

यस प्रतियोगिताले आर्बाको पर्यटन विकास मात्र नभई पोखराको खेल पर्यटनलाई विश्वमाझ पुर्याउने वडाध्यक्ष बरालले बताए । आर्बालाई साईक्लिङका हब बनाउने उद्देश्यसहित प्रालिले सन् २०२० देखि काम सुरु गरेको थियो ।

कास्की जिल्ला साईक्लिङ संघका अध्यक्ष शंकर भण्डारीले पोखरा एन्ड्युरो जस्ता अन्तर्राष्ट्रियस्तरका कार्यक्रमले पोखरालाई ‘साहसिक पर्यटनको राजधानी’का रूपमा स्थापित गर्न सहयोग पुर्याउने विश्वास व्यक्त गरे ।