विश्व बालदिवसको अवसरमा एकीकृत सेवा कार्यालय स्याङ्जाद्वारा आयोजना गरिएको पञ्चेबाजा प्रतियोगितामा कालीगण्डकी गाउँपालिकाको जनता माध्यमिक विद्यालय प्रथम भएको छ ।

आँधीखोला गाउँपालिकास्थित जनहित मावि द्धितीय स्थानमा रहँदा पुतलीबजार नगरपालिकाको लामागे पञ्चेबाजा समूह तृतीय बनेको छ । पुतलीबजारकै सरस्वती मावि नाङ्गडाँडाले सान्त्वना स्थान प्राप्त गरेको छ । विजेताहरूलाई क्रमशः १५ हजार, १० हजार, ७ हजार र ४ हजार नगदसहित मेडल र प्रमाणपत्र प्रदान गरिएको थियो ।

जिल्ला स्तरीय पञ्चेबाजा प्रतियोगितामा आदर्श सोनाम उत्कृष्ट सहनाइ बादक घोषित भए भने उत्कृष्ट ढोलकी बादकको पुरस्कार राहुल परियारले पाएका थिए । यसैगरी, कुशल परियारले प्रोत्साहन पुरस्कार जितेका थिए ।

बिजयी समूहलाई गण्डकी प्रदेश सभा सदस्य तथा सार्वजनिक लेखा समितिका संयोजक सुधिर पौडेल र एकीकृत सेवा कार्यालय प्रमुख जीवन पौडेलले नगद पुरस्कार तथा प्रमाणपत्र प्रदान गरेका हुन् ।

कार्यक्रमलाई सम्बोधन गर्दै सांसद पौडेलले कला, संस्कृति संरक्षण र पुस्तान्तरणका लागि यस्ता कार्यक्रम महत्वपूर्ण हुने बताए । बालबालिकाको अधिकार, क्षमता र आवाजलाई संगीत र गायनमार्फत् अझ प्रभावकारी रूपमा प्रस्तुत गर्न सकिने विश्वास उनले व्यक्त गरे । समाजमा बढ्दो अराजकताले बालअधिकारमा असर पर्न थालेको बताउँदै पौडेलले जिम्मेवार नागरिकको भूमिकाले मात्र बालमैत्री समाज बन्न सक्ने धारणा राखे । पञ्चेबाजा प्रतियोगिताले बालबालिकामा मौलिक संस्कृतिप्रतिको प्रेम र पहिचान थप बलियो बनाउने विश्वास समेत उनले व्यक्त गरे ।

बालमैत्री वातावरण निर्माण, संस्कृतिको पुस्तान्तरण र प्रतिभा प्रस्फुटन गर्ने उद्देश्यले प्रतियोगिता आयोजना गरिएको एकीकृत सेवा कार्यालयका प्रमुख जीवन पौडेलले जानकारी दिए । बालसञ्जाल स्याङ्जाकी अध्यक्ष सुजाता पौडेलले बालअधिकार र क्षमताको पहिचानमा यस्तो कार्यक्रम उपयोगी हुने बताइन् ।

उद्योग तथा पर्यटन मन्त्रालय र सामाजिक विकास, युवा तथा खेलकूद मन्त्रालयअन्तर्गत एकीकृत सेवा कार्यालय स्याङ्जाको आयोजनामा भएको प्रतियोगितामा विभिन्न पालिकाबाट ८ समूह सहभागी थिए भने प्रतियोगितामा बाल अधिकारका सन्देशमूलक गीत र नृत्य प्रस्तुत गरिएको थियो ।

प्रतियोगितामा पुतलीबजार नगरपालिकाबाट सरस्वती मावि नाङ्गडाँडा र लामागे बाजा समूह, कालिगण्डकी गाउँपालिकाबाट जनता मावि, गल्याङ नगरपालिकाबाट नेपाल राष्ट्र मावि, भीरकोट नगरपालिकाबाट भाग्योदय मावि, आँधीखोला गाउँपालिकाबाट जनहित मावि, त्रि–शहिद नमुना मावि र प्रधुम्न पनेरु मावि सहभागी भएका थिए ।

प्रतियोगिताको निर्णय राष्ट्रिय संगीतकर्मी संघ स्याङ्जाका अध्यक्ष बुद्धि बहादुर परियार, पञ्चेबाजा विज्ञ रेशम दर्जी र पुतलीबजार प्रज्ञाप्रतिष्ठानका सदस्य रामचन्द्र परियारले गरेका थिए । कार्यक्रमकै बीच चर्चित लोकगायक तथा सर्जक लोकनाथ सापकोटाले सांगीतिक प्रस्तुति दिएका थिए ।