पोखरा कलेज अफ म्यानेज्मेण्ट (पिसीएम) ले  ‘पिसीएम जव फेष्ट–२०२५’ सम्पन्न गरेको छ ।

नेपाल युवा उद्यमी मञ्च, पोखरासंगको सहकार्यमा कलेज प्राङ्गणमा भएको फेष्टमा बीबीए, बीसीएस आइटीतर्फ सातौं तथा आठौं सेमेष्टरमा अध्ययनरत तथा भर्खरै पास आउट समेत झण्डै २ सय विद्यार्थीहरुको सहभागिता रहेको थियो ।

फेष्टमा सुजल फुड्स, जोन्छे ट्रेडर्स, होटल सरोवर, मिन मार्ट, पोखरा इन्टरनेट, कर्माचार्य ग्रुप लगायत विभिन्न प्रतिष्ठित कम्पनीहरुको स्टलहरु रहेका थिए ।

कलेजका प्राचार्य लीना नेगी श्रेष्ठका अनुसार विद्यार्थी र व्यवसायिक घरानाबीच सम्बन्ध कायम गराउने सेतुको भूमिका निर्वाह गर्दै कलेजले विगतदेखिनै यो महोत्सव आयोजना गरेको छ ।

‘विद्यार्थीहरू आफैले खोजेजस्तो रोजगारी प्राप्त गर्नेछन् भने व्यवसायीहरूले पनि चाहे जस्तै दक्ष कर्मचारी प्राप्त गर्ने साझा थलो यो फेष्ट हो’ – उनले भनिन् । व्यवसायी घरानाका प्रतिनिधीसँग विद्यार्थीले सिधै साक्षात्कार गर्दा उनीहरुभित्रको आत्मबल पनि बढ्ने नेगीले बताइन् ।

होटल सरोवरका प्रतिनिधी सायोरी थापाले अहिले होटलमा रोजगारीको अवसर रहेको हुँदा त्यसैका बारेमा जानकारी दिने र उत्कृष्ट कर्मचारीको छनौट गर्ने उद्देश्यले पिसिएम जब फेष्टमा सहभागिता जनाएको बताइन् ।

त्यस्तै, सुजल डेरीका प्रतिधिनी अमृत तिमिल्सिनाले कलेजले रोजगार खोज्ने र रोजगार दिनेलाई एकै ठाउँमा भेट गराएर सहयोगीको भूमिका निर्वाह गरेको भन्दै धन्यवाद ज्ञापन गरे ।

कार्यक्रममा कलेजका बीसीएस आइटी संयोजक ई. हरिप्रसाद बराल, बीबीए संयोजक हरि अधिकारी, सरोज कुँवर लगायतले समन्वय गरेका थिए ।