म्याग्दीको बेनी–दरबाङ सडक अन्तर्गत मंगला गाउँपालिका–२, रणबाङ स्थित खहरेखोला नजिकैको सडकबाट ट्याक्सी खस्दा चालकको मृत्यु भएको छ ।

चालक सहित उछिट्टिएर म्याग्दी नदीमा खसेको ट्याक्सी ढिला गरी भेटिएको छ । रणबाङ स्थित खहरेखोला नजिकै म्याग्दी नदी किनारमा ध १ ज ९९० नम्बरको ट्याक्सी दुर्घटना हुँदा रणबाङका चालक ३७ वर्षिय सुजन सेनको घटनास्थलमै मृत्यु भएको थियो ।

मृतक सेनको शब म्याग्दी नदी नजिकै भेटिएपनि ट्याक्सी फेला नपरेपछि खोजीकार्यको क्रममा शसस्त्र प्रहरी बल नारच्याङको गोताखोरको टोलीले नदीभित्र फेला पारेको छ ।

ट्याक्सीको बाहिरी भाग, सिसा लगायतका पाटपुर्जा नदी आसपासमा भेटिएको थियो । ट्याक्सीमा हालसम्म चालक मात्रै रहेको अनुमान गरिएको छ ।

दुर्घटना अगाडि ट्याक्सी चालक सेनले एक यात्रुलाई घरमा लगेर छोडेर फर्किएको बताइएको छ । सडकदेखि करिब डेढ सय मिटर तल नदी किनारमा शव भेटिएपछि स्थानीयले प्रहरीलाई खबर गरेका थिए ।

घटनाको थप अनुसन्धान भइरहेको प्रहरीले बताएको छ ।