रुकुम । प्रचण्डको साथ छोडेर प्रगतिशील लोकतान्त्रिक पार्टी (प्रलोपा)मा लागेका जनार्दन शर्मालाई आफ्नै गृहजिल्लामा कालो झण्डा देख्नुपरेको छ ।

शर्मालाई गृहजिल्लामा कर्णालीका पूर्वमुख्यमन्त्रीसहितका केही नेताको मात्र साथ छ ।

आइतबार पार्टीको कामका लागि गृह जिल्ला रुकुम पश्चिम पुगेका शर्मामाथि रुकुमको सल्ले विमानस्थलमा कालो झण्डा देखाएर कार्यकर्ताले विरोध जनाएका हुन् ।

शर्मा आज जिल्लास्थित प्रलोपाको पार्टी कार्यालय उद्घाटन र भोलि हुने युवाहरूको कार्यक्रममा सहभागी हुन गृहजिल्ला आएका थिए । शर्मा आउने चाल पाएपछि तत्कालीन माओवादी केन्द्रका आठबिसकोट नगर कमिटीका पूर्वअध्यक्ष मानबहादुर चदरासहितका नेता तथा कार्यकर्ताहरू मुसीकोट–१ स्थित विमानस्थल पुगेका थिए ।

विमानस्थलमा शर्मानिकटका नेता तथा कार्यकर्ता पनि थिए । शर्मा विमानस्थलको गेटबाट निस्कन नपाउँदै पूर्वमाओवादी कार्यकर्ताले शर्माविरुद्ध नाराबाजी लगाउँदै कालो झण्डा देखाएका थिए । शर्मालाई उनका पूर्वकार्यकर्ताले जनातालाई धोका दिएको आरोपसमेत लगाए ।