स्याङ्जाको गल्याङ नगरपालिकाद्वारा आयोजित राष्ट्रपति रनिङ शिल्ड प्रतियोगिताको उपाधि भानुभक्त आचार्य माध्यमिक विद्यालयले हासिल गरेको छ ।

तीन दिनसम्म तल्लोगल्याङ खेलमैदानमा चलेको प्रतियोगितामा भानुभक्त आचार्य माविले ६ स्वर्ण, ५ रजत र ३ कास्यसहित १४ पदक जित्दै उपाधि हात पारेको हो ।

प्रतियोगितामा समान १४ पदक नै जितेको सार्वजनिक मावि दोस्रो भएको छ । सार्वजनिक माविले ६ स्वर्ण, ३ रजत र ५ कास्य पदक हासिल गरेको थियो । ५ स्वर्ण, ४ रजत र ४ कास्यसहित १३ पदक जितेको नेपाल राष्ट्र मावि तेस्रो बनेको छ ।

२२ विद्यालय सहभागी प्रतियोगितामा सात विद्यालय पदकबिहिन रहेका थिए । प्रतियोगितामा छात्र–छात्रा भलिबल, एथलेटिक्स, हाईजम्प, लङ्जम्प, सटपुट, मार्सल आर्ट करातेसहित ३२ विधामा प्रतिस्पर्धा भएको थियो ।

शिक्षा क्षेत्र नगरपालिकाको पहिलो प्राथमिकता भएको भन्दै गल्याङ नगरप्रमुख गुरुप्रसाद भट्टराईले यस्ता गतिविधिले विद्यार्थीको क्षमता पहिचान गर्न सहयोग पुग्ने बताए ।